You are here
Home > CCT Robawm > JAMES DOKHUMA

JAMES DOKHUMA

JAMES DOKHUMA

PIAN LEH MURNA; Thu leh hla lama Mizo te tan rotling tak tak hnutchhiahtu James Dokhuma hi Kum 1932, nikir thla ni 15 khan Pu Hrangchina fapa ni turin thiin a lo piang a, phum tura an buatsaih laiin a rawn thaw leh a ni. A pianpui unau te zingah hlaphuah thiam Pi Romani leh Pu Lalṭanpuia te pawh hi Mizo fate zinga hriat hlawh an ni.

James

ZIRNA; Heti khawp a Zofate zinga ziakmi lar ni mahse zirna lamah chuan a thleng sang lem lova, a pianna khua Sialsûkah Pawl 5 thleng chauh a zir a ni.

HNATHAWH; Changéla sàwi bel an sawi ang mai in hna hrang hrang a thawk kual a. Kum 13 mi anih in India Sipaiah a ṭang a, rei pawh ṭang lovin 1950 khan a bansan leh a, thil dang dangah a thawh kual hnuin kum 1954 khan St. Paul’s School-ah zirtitu hna a thawk a. Chumi pawh chu thawk rei lovin Aijal C.D Block-ah Sanitary Inspector hna a vuan leh bawk. Rambuai hma deuh kum 1960-ah a hna bansanin Hualtu khuaah zirtirtu hna thawk leh a ni.

James dokhuma

RAMBUAI; Rambuai a lo nia Mizo fate tan tiin a rammu ve nghal a, Tlungvel bial Block President a ni a, khatih laia MNF ramhnuai sawrkarah khan M.P-a ruat a ni a, chumi hnu ah Deputy Speaker-ah a ṭang leh bawk a ni. Kum 1968 March thla ah vanduaithlâk takin Vai Sipai lakah hliam a tuar a, India Sipaite’n manin Nowgong Special Jail ah an thawn a, chumi hnu ah Gauhati Jail-ah dah sawn a ni leh a. Vairam hla takah tàn in thima khung nimahse a ngaihtuahna chuan Zoram a theihnghilh thei lova, zalenna a neih theih nan ti a a nunna hial pawh thapa a beih mek Zoram chanchin chuan a suangtuahna khawvel pawh engdang mahin a chim buai pha lo. Ziakmi Pu Dokhuma chuan ram leh hnam tana a lunglenna chu boruaka tham ral mai a phal lovin Zofate lung ti leng fo tur leh ngaihnawm tih em em ni fo turin Nowgong Special Jail a tan lai hian thawnthu Thla Hleinga Zan chu a ziak ṭan a; Guwahati Jail-ah sawn a nih hnu in a ziak zo ta a ni. India ramin vawiin thlenga an ngaihsan leh Hnampa tia a koh Mahatma Gandhi leh Jawaharlal Nehru te iangin lung ina a tàn lai hian kut kuangkuaha ṭhu mai lovin ṭhangthar lo awm leh zel tur te tan thawnthu dang pahnih Rinawmin tih leh Khawhar In tih te hi a ziak zo bawk a ni.

Kum 1971 ah Jail atanga chhuah  a ni  a, kum 1973 ah E.Lungdarah zirtirtu hna a thawk leh a, chu pawh rei lo teah bansanin Aizawlah a pem luta a nupui fanau te nen Kulikawn venga a boral ni thlengin an in bengbel.

CHAWIMAWINA; Mi bik James Dokhuma hi zirna lamah pawl nga thleng chauh zir mahse pianpui finna nei ṭha mi, thiamna ngaisang mi, mi rualawt a nih avangin ama inzir zirin a inzir chho a,  sipai a tan lai pawh a Education Instructor ni pha a ni a. Aman sawi chhuah a duh vak lo nà’ng a Kum 1997 khan University of California(USA) chuan Honarary Doctorate Degree a rawn pe hial ani. High School pawh rap lo ni mahse a thu ziak thiam avangin kum 1983 khan Mizo Academy of Letters (MAL) chuan ‘Academy Award’ a pe a. India sawrkar in a khua leh tui mi hminghṭha leh chawimawi phu a tih te hnena a hlan thin Padma Shree Award pawh kum 1985 khan India President hnen aṭangin a dawng bawk. Mizo fate zinga a hmasa ber atan Sahitya Academy chuan thuziak thiamte hnena chawimawina an pek ṭhin ‘Basha Samman’ chu kum 1997 khan a hlan bawk. Zofate zinga mi danglam bik anih lanna pakhat chu a lehkhabu ziak Thla Hleinga Zan  chu Library of Congress, Washington-ah dah ani ve vàng tawh.

Pu James Dokuma hi engtik lai khan nge zofate hian thuziak mi anih tih kan hriat tan tih hetiang hian Mizo zinga thil chik mi kan neih Pu B. Lalthangliana chuan a sawi “Tun hma deuh, 1960 vel tawhah khan a titi thiam leh tawnghmang thiamzia mite’n an hre tan a. Kum 1975-a Adult Education Wing chhuah Meichher thlatin chhuak aṭang in Thu leh Hla a thiam zia mipuiin an hre lar ṭan zual ta ti ila, a dik thawkhat awm e” tiin. A thu ziah leh thawnthu te hi Sikul leh College Zirlaibuah hman a ni nual a, thu lamah chuan ‘Ka Thu Hretu’ tih thiam leh ngaihnawm tak maia fountain-penin a nunah awmzia a neih thu leh a hman ṭangkai ṭhin zia a ziah chhuahna chu Mizo zirlaite tana tunlai ṭawng taka ‘Creativity’ neihtir tura fuihtu ṭha tak ani. A thuziak pakhat “Irrawady Luikamah” tih pawh Cl-XII zirlaibuah hman ani. College zirlai lamah “Tumpangchal nge Saithangpuii?” tih leh “Thla Hleinga Zan” tih phei chu seng luh ania Mizo thuhlaril zirlaiten an hlawkpui ṭhin hle a ni. College leh University thleng pawha class la tura sawm a ni fo va; tin Debate, elocution, extempore speech leh thu leh hla lama intihsiakna hrang hranga a lawmman lak te chu sawi sen pawh a ni lo hial zawk.

A KUTCHHUAK; Hriat theih chinah lehkhabu 39, hlahril 40 chuang, article 500 chuang a ziak a.. A thawnthu ziah zinga mi “Gabatha” Christian Novel phei chu Sap ṭawnga lehlin a ni a. A article ziah ‘Gone are the Days’ tih a Sikul lo kai tawhna ṭhin Gov’t MS-I, Sialsukte’n  Golden Jubille Souvenir atana a ziah chu a mipui vantlanga tana a kutchhuak chhiar theih awm hnuhnung pawl a ni. Mi danglam a nihna pakhat chu khatih hunlaia thil ziak nana an hman ṭhin Fountain-pen tui bur khat khat khan lehkha phek engzat nge a ziah theih a, thumal engzât ziah nan nge a daih, tih lama chhutchhuaka chhhinchhiah peih khawpa mi taima a ni.

A thuziak, chhamhla phuah leh a kutchhuak dang ṭhenkhatte chu:

Thawnthu

  1. Thla Hleinga Zàn
  2. Rinawmna
  3. Khawhar In
  4. Silaimu Ngaihawm
  5. Tumpang chal nge Saithangpuii

Chhamhla

  1. A tak chu khawiah nge?
  2. Siamtu Khuarel
  3. Au ral ral
  4. Oh, Delhi
  5. Pipu Sulhnu
  6. Thü rëng ka nei si lo

Lemchan

  1. Tumna chu a hlawhtling ṭhin
  2. Hmasawnna
  3. Hausakna aiin hriselna a hlu zawk
  4. Finna hmahruai

Thutluang

  1. Zoram Tualṭo Kohhran Chanchin
  2. Hmanlai Mizo Kalphung
  3. Ṭawng Un Hrilhfiahna
  4. Mizo Ṭawng Kalphung (2005)

Ziakmi James Dokhuma hi Siamkima Khawlhring leh Peter Lianhleia te ang khan English literature khawchhung tui hang hawp pha leh English Romantic Poems a chek hang dut  pha han ni ngat teh reng sela aw….. a va ropui leh zual dawn em!

Kum 2016 April ni 7 & 8 khan Mizo Hlakutpui Mual, Khawbungah Lalsangzuali Sailo, R.Vanlawma leh James Dokhuma te hming hi sengluh an ni ta a  ni.

Similar Articles

Top