You are here
Home > World News > ISRAEL LEH ARAB NI 6 INDO THU- Familia Fanai Lalţansanga

ISRAEL LEH ARAB NI 6 INDO THU- Familia Fanai Lalţansanga

ISRAEL LEH ARAB NI 6 INDO THU- Familia Fanai Lalţansanga

Kum 50 lai a lo liam ta reng mai. Vawiin hi Israel leh a ţhenawm Arab ramte indo champha vawi 50-na a ni a, kum 1967 khan an indo va, ni 6 chiah an indo naa, a nghawng leh a sawhkhawk chu na tak a niin khawvel chanchin hi vawiin ni thleng a tidanglam ta bawih a ni.

Moshe Dayan pushed for a quick attack
Moshe Dayan pushed for a quick attack

Kan la naupang a, kha indo chanchin kha Amah A.Thanglura’n sanghar mumang a sawi ang, fiah lo deuh ruai khan kan lo hre ve kha a ni mai a,  BBC Middle East editor Jeremy Bowen hian chipchiar ang reng takin a rawn ziak hlauh mai a. Middle East expert leh specialist a ni bawk a, a khawrhchhuak kim biai turah ngai ila,  ka han kharchhawng nghal var ang e.

Israeli tanks in action on the Golan Heights
Israeli tanks in action on the Golan Heights

Rangoon-ah khan Mizo zinga 10+2 education pattern su hmasa ber kan ni a, Science leh Mathematics stream kum 2 kan zir hnu khan ka tuina ber English kha hah thi kulin kum 3 pumpuhlum ka zir a. Mizoram High Schoolah kum 30 Science ka zirtir ta a, BBC leh CNN hi kum 20 lai nitin ka lo enin ka lo ngaithla ta bawk a, internet awm hma khan India rama magazine ţha India Today leh Fronline kha kum 10 chuang ka lo subscribe bawk a, The Times Of India hi ka chhiar reng bawk a. Sap ţawng ka chhiar leh ka ngaihtlak hi ka rilruah Mizo ţawngin chawp leh chilhin a rawn awm nghal thei ta a, Mizovin rilru chak kan tih hi thluak zawk a lo ni reng a. Tluak hi kan sawizawi reng chuan mak tak maiin a lo chak tial tial thei a ni. Language hi a zir thiam theih a, tapchhak zawla tui hleuh inzirtir ang ni lovin dil leh luia a hleuhva hleuh tak tak chuan kan lo thiam theih hle a ni tih hi hriat kar tur a ni. Rilru leh thluak hi lo dah chawlawl loh tur a ni.

Nasser pictured with Egyptian jet pilots at Bir Gifgafa air base in Sinai, 22 May 1967
Nasser pictured with Egyptian jet pilots at Bir Gifgafa air base in Sinai, 22 May 1967

Ka sawi fo tawh a, Bible-ah khawvel lal fing bera ziak Lal Solomon-a nikhua loh lutuk avangin ( I Lalte 11;6)  Pathianin a hnam thlan Israel fate hi a hrem nasa khawp a, kum 2000 aia tam ka ram tih tur nei lovin he khawvel ram zauvah hian an vakvai a.

Members of Fatah on parade in the Jordanian capital, Amman, in August 1970
Members of Fatah on parade in the Jordanian capital, Amman, in August 1970

 Isreal khan zalenna a puan hnu lawk kum 1948 kum tawp lamah khan Israel ram ţhenawm Arab ramte khan khawvel map atanga Isreal ram nuai bo turin a siruk laiin a do  nghal ta rup mai a.

Nasser became a hero in the Arab world in the wake of the Suez crisis
Nasser became a hero in the Arab world in the wake of the Suez crisis

 Israel sipaite chuan Aigupta sipaite chu a sawp ta zek a, mahse Falluja hmuna Aigupta sipaite chuan Israel sipai kuta inpek mai chu tlawmpaeksenah an neih a.  Chu Aigupta sipai hmuna an sipai hotu chu chu mi huaisen tak kum 30-a upa Major Gamal Abdel Nasser a ni a, Israel sipai lama sipai huaisen chu kum 26 mi Yitzhak Rabin a ni thung a ni.

Yitzhak Rabin (left) was Israel's chief of staff by 1967
Yitzhak Rabin (left) was Israel’s chief of staff by 1967

 German lal tawrawt leh nunrawng tak Adolf Hitler lal chhung khan Nazi-te chuan Juda mi mtd 6 an suat hman a, kawvel ram ropuite’n an lainat deuh avangin Pathian lehkhabu thianghlima Juda ram ngeia ram thar han din Judaho duhthusam chu a takin a rawn tleng ta a ni a.

King Hussein of Jordan
King Hussein of Jordan

 Israel ram lo piang ta chu Philistia mi, tuna Palestinian intite tan chuan vanpui a chim hi a ni hrim mai a, “al-Nakba”, chhiatna tawp khawk an ti tawp mai a, an rama an lo neih ţhin ram atang chuan Palestinian mi 750,000 lai chu hnawhchhuah an niin Israel chuan lo let leh a phal lo bur mai si a ni.

Abdul Hakim Amir was the commander of Egypt's armed forces
Abdul Hakim Amir was the commander of Egypt’s armed forces

 Mak tak maiin ram thar piang hlim Israel chuan indo a hneh ta zawk a, Arab ram sipaite an zak chem chem a, khuk ral raih an chak a. Syria ramah sipaiin sorkar an paih a, thuneihna an la. Egypt ramah pawh Israel ram a pian atanga kum 4-naah Major Gamal Abdel Nasser chuan an lal paihthlain thuneihna a la a, Egypt president a lo ni ta a ni.

Israeli Prime Minister Levi Eshkol was mistrusted by younger Israeli generals
Israeli Prime Minister Levi Eshkol was mistrusted by younger Israeli generals

 Kum 1956 khan Suez canal chu a la ta hmak a, Britian leh France ramte a pawisak lohzia a lantir a, Arab ramte’n Nasser chu an ngaisang em em a, Arab ramte’n hotu ena an en a lo ni ta a.

Hetih lai hian Isarel sipai huaisen Yitzhak Rabin chu kum 1967 chuan sipai hotu lal ber chief-of-staff a lo ni ta bawk a.

Civil defence preparations in Tel Aviv, June 1967
Civil defence preparations in Tel Aviv, June 1967

Israel ram ţhenawm Arab ramte chu an lung a dam thei ngang lo va, Israel ram chu tihchhiat hlauh an tum rilru ran ta mai a. Chu Arab-ho rilru chu Israel sipai hotu Yitzhak Rabin chuan a hai bik hlauh lo va, indo hmachhawn thei turin a rukin a lo inbuatsaih sauh sauh ve thung a ni.

Israel leh Arab ramte hi ui leh kel thlun pawlh aia inhal em em, in haw hluah hluah  an ni a, Chu inhuatna  mei si chu kum 1950 chhawr bawr vel leh 1960 chho bawr vela America leh Russia inepna boruak Cold War khan a rawn tizualkaiin a rawn chhem alh  ta a.

UN peacekeepers in Sinai and Gaza were expelled by Egypt
UN peacekeepers in Sinai and Gaza were expelled by Egypt

Mizovin Russia kan tih mai khatih laia Soviet Union chuan Aigupta ram leh Syria ramte chu indo thlawhna ţha chiin a thuam ţha sauh sauh va, Israel leh America chu an inţhian ţha hle a, mahse hetih lai hian America hian Israel hi ralthuam lamah a la ţanpui lo va. Israel chuan France ram siam indo thlawhna te a lei a, Britain ram atangin tanks te a lei ve ta bawk a. Isarel hian indo lo awm leh ta se, an dinhmun derthawn theihzia an hre chiang em em a, Isarel rama pem lut Jud ate chu sipaiah a la ta zung zung a, sipai maktaduai 1 lai a nei ta mai reng a ni. An sipaite hi rang taka che nghal thei turin an zirtir a, Atomb Bomb siam lamah pawh an hmanhmawh hle a, kum 1967 khan an nei hman ţep tawh reng a ni.

Israeli occupation replaced Jordanian occupation in the West Bank
Israeli occupation replaced Jordanian occupation in the West Bank

Israel ramin atomb bomb a nei tur hi Soviet Russia hian a huphurh deuh nge ni dawn, Arab ram hruaitutte a bum a, Israel Atomb bomb siam tisukuk turin a Arab ram hruaitute leh Israel chotuah ta a ni ber awm e.

 Hetih lai hian Egypt ram chuan Suez canal buaina chungchangah hnehna an chan avangin an lawmin ropui an inti hle a, an lal Nasser chuan Israel laka phuba na taka la thei tur chuan Arab ramte tanrual a ngai tih hria-in Arab ramte a tlawn sauh sauh va. Syria nen phei chuan an inhnimhnai hle reng a.

The 1967 war changed many people's perception of Israel and its armed forces
The 1967 war changed many people’s perception of Israel and its armed forces

 Israel sipai hotu Rabin chu a sipaite chu a han vil ngun mai mai khawp a, Israel sipai tan eng indovah pawh  chak loh a thiang lo tih kha a thu rolum a ni tawp mai.

_96305952_israel-before-after-v18

Egypt President Nasser chuan a laka rinawm bur mai Field Marshal Abdul Hakim Amer chu sipai hotu lu berah a dah a. Syria ramah pawh sipai lal atan Syria lal chhungkaw tana rinawm tur general an thlak kual reng a.

_96277472_jerusalem-control-v7

Hetih laia Jordan lal King Hussein chu a fimkhur a, Britain leh America ram hruaitute nen an inţhian  ţha em em reng a, King Hussein-a pu King Abdullah phei kha chuan Juda te nen a ruk te-a inbia-in Israel ram lo pian dan tur thleng ruahmanna a lo siampui a lo ni a.

5 June: Egyptian warplanes destroyed on the tarmac
5 June: Egyptian warplanes destroyed on the tarmac

Kum 1951 khan Palestinian nationalist pakhatin Abdulla chu Jerusalem al-Aqsa Mosque-ah a that ta mai a, kum 16 mi Prince Hussein chu Jordan lal a lo ni ta a. Kum 1948 indo hnu khan Israel leh Jordan chu hmelma enin an inen lem lo naa inremna thuthlung chu an siam thei bik lo a ni. Husseina rawn lal hnu pawh hian Israel nen inbiakna an nei ru fo va, Palestinian-ho hi an ram tan hling ang an la ni thuai dawn tih a hriat chian em vang a ni a.

Egypt's air force was decimated by Israel's pre-emptive strike
Egypt’s air force was decimated by Israel’s pre-emptive strike

Syria ram chuan Jordan lui hi an rama luantir a tum ta mai a, Israel leh Syria ramriah inkahna a thleng ta fo mai a, Syria chuan Israel laka hel Palestinian hel pawl a zuah buk a, chung hel pawlte chuan Israel chu an bei chamchi ka mai a.

israel

May thla ni 31-ah Soviet Union chuan Aigupta president Nasser hnenah Israel sipaite Syria ramri-ah an inchhawp rup tawh a, an indo ţep tawh tih thuruk a hriattir ta a, darkar 24 hnuah Egypt supreme commander Field Marshal Amer chuan a sipaite chu a inralrintir vek hman a. A hnu ni hnih-ah Egypt chuan Israel nena an inrinna vengtu UN peacekeepers te chu a hnawtchhuak a, Sinai thlaler-ah Egypt sipai rual a dah ta thung a.

i2

 May ni 22-ah Nasser chuan Straits of Tiran, Sinai leh Saudi Arabia inkar, tuipui Sena Israel lawngte luh a khap a, hei hian America President Lyndon Johnson a tithinrim hle a. UN Secretary General U Thant chuan remna zawngin Egypt-ah thlawk lut a, Nasser chuan a lo tiam tawh angin silai hmet puak hmasatu a nih loh tur thu a lo tiam leh a.


Nasser-a’n Straits of Tiran a khar tukah chuan Israeli prime minister Levi Eshkol chuan cabinet meeting ko nghalin darkar 48 chhunga Israel sipai 250,000 te chu Egypt leh Syria ramri-a inchhawpa indo nghal thei tura inralring turin thupek tihchhuah a ni a. Israel rama mipa kum 50  hnuai lam zawng chuan sipai uniform an ha ta vek mai a.

Israel sipai hotu General Rabin pawh a ngaihtuahna a zing phui mup a ni ber a, Israel ram ţhenawm Arab ramn zawng zawngin Israel ram an beih rawn dawn tih a chiang ta si a,  a thil ngaihtuah nasa lutuk chu cigarette a zu khu vut vut reng mai a, a meizial zuk a chelh lo va, nikhaw  hre lovin a tlu leh ta rih a.

Darkar 24 a mu tawp a, a rawn harhchhuak leh ta a, hna a thawk chhunzawm leh ta nghal a ni.

Israel foreign minister Abba Eban chu Washington-ah thlawk thlain President Johnson a zuk bekbawr a. President Johnson chuan Israel chu indo chawk chhuak hmasa tu ni lo hram turin a lo ngen a, Straits of Tiran khar chungchang chu chinfel a tum tur thu leh kar hnih tal lo ngaichang hram hram turin Israel foreign minister Abba Eban chu a lo ngen a.

Abba Eban thu rawn hawn angin Israel cabinet chuan May ni 28-ah kar hnih la nghah chu an remti a, he thu hian Israel sipaite a tithinrim hle thung a ni.

Israel enthlatu pawl lian tak Mossad hotu Meir Amit chu Washington DC-ah thlawk a, US defence secretary Robert McNamara a bia a, a ruh lang rawtin indo thut a rawt a, Robert McNamara chuan zawhna pahnih chiah a lo zawt.

“Engtia rei nge in indo ang ? Sipai thi leh hliam eng zat nge awm ang?”

A chhanna chu; Chawlhkar khat chiah kan indo ang a, inhliam leh thi chu kum 1948 indona-a thi mi 6,000 aiin an tlem ang.

Robert McNamara chuan, I thu sawi ka man chiang e, a ti a.

Mossad hotu Meir Amit chu thlawhna  in a haw leh vang vang a, Washington-a Israel  ambassador Abe Harman nen gas masks thlawhna khat tlatin an phur haw bawk a, Israel ram khawpui Tel Aviv chu June ni 3 Inrinni-ah tluang takin an tleng a. Mahni in pawh tlawh lovin  Israel Prime minister Eshkol in an pan ding nghal a, Amit chuan indo nghal rap a duh a, ambassador Abe Harman chuan chawlhkar khat vel ngaih chan rih a duh a, One-eyed Moshe Dayan chuan , “ Kar khat ka nghah leh vaih chuan kan sipaite an thi hnem lutuk ang,” tiin ţan a khawh bur a. “ Kan bei hmasa tur a ni a, politics a nghawng kal zel chu nakinah kan ching fel tur a ni, a ti a. Moshe Dayan thu rolum chu Israel cabinet chuan an pawm ta.

Egypt President Nasser chuan Israel hian June ni 4 emaw, ni 5-ah emaw indo an ţan ang tih an lo ring lawk a, Iraqi armoured division, Iraq sipai rual leh tank tam tak chu Israel ramri panin Jordan phai ruamah an rawn kal mup mup tawh  mai si a, hei hi Israel chuan kut kuangkuahin a en mai mai tawp lo vang tih a ring nghal mai a ni.

June ni 5 chu a lo thleng ta a, zing 7; 40 a ni a,

Israel indo thlawhna pilot te hian kum tam tak an lo zir lawk ţhin, Egypt, Jordan leh Syria rama thlawhna tum hmun pawimawhte thlalak an lo neih sa kiau chu a takin an bomb ţan dawn ta a ni. Isreal pilot te hian an hmelma Arab ram thlawhna pilot te ţawng ri pawhan tawng aţangin  tu nge tih an lo hre lawk diam tawh a ni.

Egypt sipai hotu lu ber Field Marshal Amer leh Egypt sipai hotu lawkte chu Sinai thlaler Bir Tamada thlawhna ţum hmunah thu pawimawh tak relin an ţhu khawm ţan chiah a. Israel indo thlawhna te chuan bomb an rawn thlak ţan ta mai le! Egypt sipai hotu lu ber Field Marshal Amer chu thlawhna pakhatin a thlawk chhuak hman hram a, Egypt thawhna ţum hmun zawng zawng chu Israel indo thlawhna te’n an lo bomb chhe vek tawh si a ni.

Tel Aviv-ah chuan Ezer Weizman chu a lawm hle mai a, a beisei aia Israel pilot te an chet ţhat em avangin a nupui  phone-in a be nghal var a, Indonaah hnehna kan chang ta, a ti!

June ni 5 hian Israel indo thlawhnate chuan Egypt mai ni lo, Jordan leh Syria air force te chu an chhu chhe vek hman a, boruak-ah ber Israel an chungnun tawh chuan a bak chu a hnip ta zaih mai a ni.

Israel chuan Jordan lal hnenah Indonaa  ring lo rawlh lo turin an lo hriattir tawh a, mahse hum sual a dai a, a sipaite chu ral rel thiam lo tak Egypt sipai hotu thuhnuaiah a lo dah laklawh tawh si. A  Lal lukhum hloh leh chan  ai chuan Egypt lama ţan kha a duh ve zawk si a ni.

An indo dan kim chang kan sawi vek seng lo. Ni 5 chhungin Israel chuan Davida’n Goliatha a thahna ram, thisen luanna ram Gaza a la a, Egypt tam Sinai thlaler a la bawk a, Syria ram Golan Height a la a, Jordan ram ni ţhin West Bank leh  East Jerusalem a la ta bawk a ni. Tichuan, kum 2000 chuang Juda hmun thianghlim ber mai chu Israel chuan Mosolman ho kut atangin a la let leh thei ta a ni.

Egypt President Nasser pawh a rilru a na ngang a ni ta ve ang , kum 1970 khan a thi ta nge nge.

Jordan lalpa King Hussein chuan East Jerusalem a chan hlauh va, a lal lukum erawh a chan lo thung a, kum 1994 khan Israel nen inremna thuthlung an ziak fel ta.

Syria ramah chuan air force commander Hafez al-Assad chuan an lal paihthlain sipai chakna hmangin thuneihna a la a, tunah a fapa Bashar chuan Russia tanpuina-in thuneihna a la chang hram hram. A ram Syria ram chu firfiak pawl tawrawt tak, mi lu tan bun ching  Islamic State lo pianchhuahna ram, anchhe dawng ram a lo ni ta.

 Israel, Prime Minister Eshkol pawh kum 1969 khan lungphuchawlin a boral a, Golda Meir-in a rawn thlak ta a ni.

The ramifications of the war are still felt, 50 years on
The ramifications of the war are still felt, 50 years on

NI 6 INDO HNU LAMA THIL TLENG PAWIMAWH ZUALTE;

  • Yitzhak Rabin chu kum 1970 chho vel leh 1992-1995-ah te khan Israeli prime minister a ni a, Palestinian ten en inremna Oslo peace accords an ziak a, hei vang hian Nobel Peace prize a dawng a, kum 1995 khan ultra-nationalist pakhatin Tel Aviv-ah a that.
  • King Hussein of Jordanchuan kum 1970 khan an ram atangin PLO te a hnawtchhuak vek a, kum 1973-a Egypt leh Syria ramte’n Israel an donaah tel ve turin an sawm a, a hnar fithla hlauh. Kum 1999 khan a thi.
  • Syria lal Hafez al-Assad; kum 1970-ah sipai chakna hmangin Syria ramah thuneihna a la a, Israel chu a hmelma kum hlun angin a en reng a, kum 1073 khan Golan Height chu Israel atanga lak let leh a tum a, mahse a hlawhchham a, kum 2000 khan a thi.
  • Egypt president Gamal Abdel Nasserchu kum 1970 khan lungphuchawlin a thi. A aiawhtu Anwar Sadat chuan Israel nen inremna a siam ta hlauh va, kum 1981 khan Egypt officer pakhatin a that.
  • Kum 1990 atang khan America President hmalakna-in Israel leh Palestinian inkarah inremna an zawng a, kum 1993 khan President Clinton hmalaknain White House kawt phur hmunah hmema hlun Israel prime minister Yitzhak Rabin leh Isreal thisen chhuah hnem tak PLO hruaitu Yasser Arafat te chuan inremna thuthlung ziakin an inchibai a ni.

 

NI 6 INDONA LO CHHUAHNA BUL TIMELINE

  • 1955; Palestinian fedayeen-te’n Juda mi 278 an that.
  • July 26, 1956; Egypt President Nasser-in Brtiain leh France ram ta Suez Canal a chhuhsak.
  • October 29-March 3, 1956; Israel Sinai beihna avangin Sinaiah UN peacekeeping force in an veng a, US chuan Israel tan Straits of Tiran-ah Israel lawng kal phalna a pe ta bawk.
  • Nov 18, 1959; Israel chuan National Water Carrier Project hna a thawk ţan.
  • Jan 14-17 1964; Arab ram hruaitute chuan Israel ram tihchhiah vek dan tur an phiar ru.
  • November 1964; Syria chuan Jordan lui an rama lak pen a tum.
  • November 1964; Syria ram sorkar thar Baathist  chuan Israel ram tihchhiat hlauh chu a hna ngaih pawimawh ber tur a nih thu an puang
  • July 7, 1966; Syria thlawhna te’n Israel ram an bomb a, Israel-in Syria indo thlawhna MiG-21 a kahthlaksak.
  • Nov 4, 1966; Egypt leh Syria ram te’n ram venhimna thuthlung an ziak.
  • Nov 4-10, 1966; Israel mite beiha a hluar tulh tulh.
  • Nov 13, 1966; Israel commando-te’n Palestinian firfiak pawl an bei let ve ta.
  • Jan-April 1967; Syria in Israel ram laipuiin a sai nasa hle a, Israel mite an ralti hle.
  • April 7, 1967; Israel indo thlawhna te’n Syria laipuite an bei let.
  • May 13, 1967; Syria in Israel ram vawi 14 aia tam a beih hnu-ah Israeli PM Eshkol chuan Syria chu Israelin phuba a lak ve ngei tur thu a hriattir ta.
  • May 13-14, 1967; Soviet Union ( Russia) chuan Syria ram chu Israelin a do tur thu Egypt a hriattir a, hei hi thu duk ziktluak lo a ni.
  • May 14, 1967; Egypt chuan Soviet Union thusawi awiin Israel ramri-ah sipai a chhek ta chiam.
  • May 16, 1967; Egypt chuan a sipaite Sinai thlalerah a chhek chiam a, UN peacekeeping force te a hnawtchhuak.
  • May 18, 1967; N. Secretary General U Thant chuan Egypt president Nasser a bia a, Nasser chuan indona silai hmet puak hmasatu a nih loh tur thu a lo tiam.
  • May 19, 1967; Egypt chuan a sipai sing tam tak Israel ramri Sinaiah a chhek leh chiam a.
  • May 22, 1967: Egypt chuan Straits of Tiran-ah Israel lawngte kal a khap bur.
  • May 23, 1967; US President Johnson chuan Egypt in Israel lawng Straits of Tiran-a luh a khap chu dan bawhchhiatna lian tak a ni tiin a sawisel nasa hle.
  • May 24 – June 4, 1967; Arab ram 6 te chuan Israel ramri hrulah sipai 230,000 an dah ta rup.
  • May 27, 1967; Egypt President Nasser chuan Israel beih thut a tum thu a ţhulh leh thut.
  • May 31 – June 4, 1967; Arab ram 6 te chuan an thil tum an puang. “ Khawvel map atanga Isreal ram nuai bo hi kan tum a ni”
  • DAY 1, JUNE 5, 1967; Israel indo thlawhnate an che ta, ni khat thil thuah Egypt, Syria leh Jordan indo thlawhnate an bomb chhe vek hman.
  • DAY TWO, JUNE 6, 1967; Indona an tan ta tak tak a, hmun tin mai chu indona mual a lo ni ta.
  • DAY 3, JUNE 7, 1967; Israel sipaite’n East Jerusalem an la, Egypt in Straits of Tiran a khar thei ta bik lo.
  • DAY FOUR, JUNE 8, 1967; Israel in West Bank an la.
  • DAY FIVE, JUNE 9, 1967; Golan Height inchuhin Israel leh Syria sipaite an inkap nasa hle.
  • DAY SIX, JUNE 10, 1967: Israel in Golan Height an la fel.

 He ni 6 indonaah hian Arab ram  5, Egypt, Syria, Jordan, Iraq leh Lebanon te chu Algeria, Kuwait, Libya, Morocco, Pakistan, PLO, Sudan leh Tunisia te’n an ţanpui bawk a ni.

 

Similar Articles

Top