You are here
Home > Zoram > HRIL A VA HAI TEH LUL EM, PI HMA LEH! – Familia Fanai Laltansanga

HRIL A VA HAI TEH LUL EM, PI HMA LEH! – Familia Fanai Laltansanga

HRIL A VA HAI TEH LUL EM, PI HMA LEH! – Familia Fanai Laltansanga

Tukin chu Lengchhawng Press neitu leh ka publisher ni bawk  Pu V.L.Zaikima ka va tlawh e, ka ti a, ka rin loh deuh maiin inleng an lo awm neuh neuh va, banga an milem tar chu ka han en chiang a, Pu V.L.Zaikaima nupui Pi Hma-i ( Lalhmangaihzuali) chu thin cancer avangin Ni 26, May 2017 khan Rih sang mual a lo liam reng chu lo niin! Ka hril a va hai chiang em, Pi Hmai leh!

IMG_20170609_115612

Amah Lalawithang pa ianga “ Puini chu  lem ang zuk der teh la, hring lamah Hma-I lo let leh la” han tih tak hi ka nap a.  

IMG_20170609_115438

Pi Hma-i nen hian kan inbe tam hman țhin lo va, an pa nen hian kan titi dun tam a, huan chanchin leh fate chanchin kan sawi hmasak loh chuan lehkhabu ziak leh tihchhuah lam hi kan sawi thei ngai reng reng lo va, an inah hian kei mi zakzum tak heti fakauva ka tlangnelna chhan hi Pu. V.L.Zaikima rilru țhat mai bakah an nu, Hma-i hi a rilru a tluang tih a chiang reng mai a. Ka lehkhabu ziakte hi Lengchhawn Press-ah hian ka chhuttir thin a, an kutchhuak hi a dak zarh bik a, an uluk bawk a, lehkhabu editing hi hun a hek a, ka tuihal rilțam apiangin an chawbel hi ka zen ngam a ni.

IMG-20170609-WA0001

Kumin April thla khan kan fanu chu New Delhi Maulana Azad Medical College atangin Doctor, Radiology specialist a zir zo ve ta reng mai a, kan lawm hle a, an zirlaia hahthlak a tih ber mai chu MRI leh ST Scan report ziak hi a ni tih a sawi țhin a. Fimkhur takin internet lam atanga inzir reng chungin zan khaw tai rek rek thleng uluk taka an ziak thin thu leh an ziah dik loh vaih chuan an senior Vai doctor leh an consultant te’n nasa taka an hauh țhin thu a sawi fo a ni.

IMG-20170609-WA0002

Aizawla lo thawk reng tawh Lunglei doctor pakhat chuan, “ In fanu hi Mizoramah lo chhuak tawh se, ST Scan leh MRI report ziak thei mumal pawh an awm lo va, a buaithlak lutuk a ni,” tih min hrilh a. “MRI leh Lung (Heart) lamte pawh zir belh zel a la duh a, all india  PG te pawh pek a la tum a, a inzir leh mek tiin ka chhang a, a thusawi chu ka lo ngaihtuah zui teh chiam lem lo va.

IMG-20170609-WA0003

Tichuan, tukinah chuan Pu V.L.Zaikima chu an nu dam loh dan chanchin min han hrilh teh le, ka ti a, a thusawi ngun takin ka ngai tla ta a.

IMG-20170609-WA0005

Kum 2014 khan a mîta lungte awm chu Civil Hospitalah țha takin an zai a, nikum kum tawp lam atang khan a insawisel zing ta deuh a, a khat tawkin thisen exam leh ultrasound te tih a niin Result a țha an tih zel avangin thlamuang takin an awm a, Kumin January thla khan Typhoid-in a damlo a. March thla tawp lam khan khawsik leh pum nă tawrh hreawm tak a neih tak avangin doctor hrang hrangte rawnin an inentir  ta chhen a. Thil serious a awm lo tia an hnem zel chungin a nă chuan zual lam a pan zel a, Damdawi inah dah luh a niin investigation hrang hrang tih a ni a. Gyne ( Hmeichhe lam, Medicine leh Surgery Specialist te’n uluk taka an en hnuah kala lūngte awm bak chu natna serious taka wm lo angin an hrilh zel mai a. Kar khat damdawi ina a awm hnu-ah inlama inenkawl tura lakchhuak a ni ta a.

IMG-20170609-WA0004

Hma a sawn loh avangin CT Scan leh Colonoscopy tih a ni a, a thin chu inches 4zetin a pangngai aiin a lian tih hmuhchhuah a ni a. Antibiotics in enkawl leh a ni a. Kal (Kidney)-a lungte awm chu phai atanga lo kal  Urologist in stent a vuah a, hei hi lungte chhuah hma theihna tura tih a ni. Hmasawnna em em a awm loh avangin April ni 20 khan AMRI Hospital, Kolkatta panpui a ni a. Investigation an tih nawn leh vek hnuah thin cancer advanced tawh tak a ni tih hmuhchhuah a ni ta mai a. Inchhan theih chi a ni tawh lo va, zai chi pawh a ni tawh lo a, damdawi ei tur chawhin kar khat hnuah an lo haw chho va. May ni 8-ah cancer damdawi chu tihtawp a ni a, thisen unit 2 pek a ni a, May ni 17 atang chuan hniam lam a pan chak ta hle a, May ni 20 atang khan a chau zual a, amah tlawhtute pawh a hre thei tawh lo a. May ni 25 chawhma dar 10;30 khan a lo boral ta a ni.

IMG-20170609-WA0006

A sawi zo chiah chu zawhna ka zawt nghal a, Mizorama investigation an tih zawng zawng report-ah khan natna khirh leh serious a awm lo tih vek a ni si a, an thin cancer kha tu doctor mahin an lo detect lo tihna a ni maw? ka ti a. Pu V.L. Zaikima chuan, “Chu tak chu a ni, an lo hre chhuak lo reng reng a, Kolkatta kan zuk thlen chuan investigation an ti a,  a natna dik tak an hmuchhuak a, zai chi a ni tawh lo tih min lo hrilh ta mai a ni, a ti.

IMG-20170609-WA0007

Mizoramah hian medical profession,tihdam rawngbawl hna   hi sumdawn nan kan hmang nasa ta hle mai a, Mizo hnam hi hnam hrisel loh tak leh bawrhsawm tak kan ni a, damdawi in tin mai hi kan bawr luai luai hlawm a. MRI (Magnetic resonance imaging), CT ((computed tomography) Scan, Ultrasound  leh X.Ray te thleng hian kan technician te  kan report hi a dik em? Sum siam nan mai mai an ti mai mai em? tih hi mipui damlo te pawh hian kan chik a, kan fimkhur tlan chu a hun ta hle a, mi sumsiamna thangah kan in awk tang vel mai mai ang a, damna nei si lo sum kan seng thlawn țeuh si ang tihte hi thil hlauhawm tak a lo ni ta a ni. Nunna hi a hlu a, natna hmuhchhuah hma hi nun chhanhim theihna thil pawimawh tak a ni.

 

Zawhna pawimawh tak chu sum le hun leh tha tam tak senga  Mizorama investigation an tihte hi a rintlak tak tak em? tih hi a ni ta!

Similar Articles

Top