You are here
Home > Health > HPV CHU ENGE? Part 1 – Dr.Eric Zomawia

HPV CHU ENGE? Part 1 – Dr.Eric Zomawia

HPV chu natna hrik te ber virus zinga mi niin Chhulhmawr (cervix) cancer zawng zawng deuhthaw (99%) thlentu a ni. Sex ațanga kai a ni.

HPV chuan eng natnate nge a thlen?

Chhulhmawr cancer bakah ka chhung leh hrawk cancer, mawng leh serh cancer, mipa leh hmeichhiaah a thlen thin. Tin, chhulhmawr, serh, mawngkua leh hrawk velah vunchawr/bawk (wart), cancer ni si lo a thlen bawk thin.

HPV in engtinnge chhulhmawr cancer a thlen?

HPV chu sex hman atanga kai a ni tlangpui a, hmeichhia sex hmang tawh 70% zetin HPV an kai a, mahse chung kai zinga 90-95 % velah chuan an kai atanga thla 6 chhungin amahin a reh/bo leh a, 5-10 % vel erawhin an benvawn (HPV an pai hlen) thin. A benvawn ho zinga tlemte in cancer hmahruai (CIN/Dysplasia) an nei thei a; CIN hi chhulhmawr test (Pap test) atangin a hriat theih a, a nasat dan indawtin CIN I, CIN II, CIN III an ti țhin. CIN hi cancer ni lovin nakin hnua cancer-a chang thei, cancer hmahruai a ni.

CIN nei ho zinga a tlem zawk chuan hun a lo reiin chhulhmawr cancer an vei ta thin a ni. A tlangpuiin miin HPV a kai leh chhulhmawr cancer a vei chhung hi kum 10 a ni țhin.

HPV chauh hian em ni chhulhmawr cancer siam?

Chhulhmawr cancer vei tur chuan miin HPV a kai ngei ngei a ngai (HPV is a necessary cause for cervical cancer), mahse amah ringawtin a thlen thei lo. Thil dang (cofactors) a awm tel a ngai a, chung chu – sex atanga kai natna hrik hrang hrang (herpes, HIV, chlamydia), meizuk, fa neih tam lutuk, oral contraceptives rei tak ei, kum la naupan deuh laia sex hman, kawppui neih tam.

(Chhunzawm tur).

 

Similar Articles

Top