You are here
Home > World News > HONG KONG – LAWNGCHAWLHNA RIM TUI CHU

HONG KONG – LAWNGCHAWLHNA RIM TUI CHU

HONG KONG – LAWNGCHAWLHNA RIM TUI CHU

“I thusawi chu ka pawm thei hauh lo va, mahse i ngaihdan i sawichhuah theihna, i zalenna erawh chu ka nun thapin ka humhimsak tlat ang che” tih thu , “I disapprove of what you say, but I will defend to the death your right to say it” Voltaire sawi kha kum zabi 18 laihawl vel atang khan khawvel pum huapa free speech a awm theihna tura an ţanchhan leh an sawi zin pawl tak a ni a. ( Voltaire thuziak hi ka atchilh thin a, Candide phei chu ţha bon tawp, freedom of religion, freedom of speech, separation of church and state chungchanga sulsutu leh thawh hlawk tak a ni a ).

overlook_hong_kong_island_north_coast_victoria_harbour_and_kowloon_from_middle_section_of_lugard_road_at_daytime_enlarged_version_and_better_contrast_revised

Tunlai Hong Kong boruakah chuan Voltaire sawi ang ni lo zawk, “ I thusawi chu ka pawm loh bakah Hong Kong rorelna inah hian i duh zawng sawichhuah theihna pawh i nei lo tih hi ka hraittir a che’ tih hi nimina China sorkar thuchhuak chu a lo ni ta si a ni.

800px-hk010

Mihring hian zalenna vawrtawp hi kan duh fo va, Hong Kong-ah pawh khian zalena duh pawl an awm ve a, an pawl zinga mi eng emaw zat chu roreltu atan thlantlin an ni a, roreltu atan lakluhna thuthiam an tiamtir lai chuan China sawrkar sawichhiatna te an tlangaupui ta mai a, Assembly chhungah tharum hmanga innawr buaina te a thleng ta hial a. Sixtus Leung leh Yau Wai-ching te phei chuan Beijing thuhnuaia awm an duh bau loh thu an sawi a. Communist China ram atanga zalenna sual boruak han siam an tum ve a ni.

te-collage_hong_kong
Li Fei, chairman of the Basic Law Committee of China parliament, chuan nimin khan thuchhuah siamin China ram sawichhiat emaw Hong Kong independence lam sawi mawi emaw chu Hong Kong sorkar chuan a pawmzam thei ngai dawn hauh lo va, chutiang hmalakna reng reng chu theihpalingkawhin a hmachawnin a dodal zel dawn a ni, a ti a, Hong Kong hian mipuite thlan sorkar hran a nei a, mipuite zalen taka an khawsa thei hi China sorkar zahngaihna vang liau liau a ni, a ti.

800px-golden_bauhinia_square_20080830

Hong Kong hi lawngchawlhna rim tui tihna a ni a, a official hming dik tak chu the Hong Kong Special Administrative Region of the People’s Republic of China a ni a, a Mizo tawng chuan China sorkar hnuaia mipuite ro inrel theihna chanvo sang bik an neihna hmun Hong Kong tihna ang a ni mai ang chu. Pearl luipuiin tuifinriat a finna luipui kam leh tuifinriat kama awm a ni a, thliarkar ang zawng pawhin a sawi theihna lai a awm a, a khaw thleng zau zawng khi 1,106 square kilometres (427 sq mi) a ni a, chutiang hmun chep takah chuan mi mtd 7.3 an awm a, khawvela mihring bitna ber 4-na a hauh pha a ni. Hong Kong chu mihring finthiamna a sang a, an sum lakluh pawh turu tiah tiah tak a ni a, a dam pawh an dam rei tlangpui a, hmun leh hma an neih tlem em avangin inchhawng sang skyscraper an sa nasa a, an thluak hi a chawl lo va, mi an rel ve hman mang mang lo va, hna tul leh thil tul lovah inleng an nei ve mai mai lo.

Sixtus Leung leh Yau Wai-ching
Sixtus Leung leh Yau Wai-ching

Kumpinu khan Opium hmangin Chinese-ho a sawp a, 1839-42 inkar khan an indo ta ngei a, First Opium War zawh kha chuan China ram zau tak mai khi Kumpinu ram bung, colony a lo ni ta a, finrawl chhuahin kua a hreuh belh zel a, Hong Kong a la leh a, a hnu 1860 kumah Kowloon Peninsula a la leh ta a. 1898 kum khan heng Kumpinuin a ram lak thar New Territories te chu kum 99 hmang hawh (lease) turin China nen thu an thlung ta a. Sappui lung fingin khua an han din chuan rei lo teah Hong Kong chu khawvel sumdawnna hmunpui a lo ni ta mai a. Japan ral a lo lian a, Kumpinu-in a ngam lo hle a, Hong Kong pawh Japan kutah a tlu ta a.

_92300882_mediaitem91772679
America sorkarin Japan ram chu Atom bomb hmanga a chhut chauh tak avangin Indopui II-na chu a lo tawp ta a, Kumpinu chuan Hong Kong chu a luah hawh leh thei ta a. 1980 kum chho bawr vel atang khan China communist sorkar chak tak leh chaurau rek thai ţan tawh United Kingdom sorkarte chuan Hong Kong inhlanlet dan tur chu uluk takin an ruahmuan tan a. 1984 kum khan China leh UK chuan Hong Kong inhlanlet dan tur inremna thuthlung Sino-British Joint Declaration an ziak fel thei ta a, an thutlung ang chuan 1997 kha khawvela decocrary hmang hmasa berte zinga mi UK chuan Hong Kong chu Communist ram China kutah a hlan fel ta a, China sorkar pahwin rilru puitling tak leh pa chan chang takin Hong Kong chu mahni inrelbawl theihna thuneihna sang a pe a, ram pakhat ang deuh thawin a indantir ta a ni.

_92301908_0c211a2d-99e3-44a9-95c6-e861a306cbf0

An thuthlunga an lo ziak ang leh an lo duan angin Ram bungkhat chhunga rorel dan chi hnih, “one country, two systems” dan hmangin Hong Kong chu China ram ang Communist ni lo, political leh economic system hran daih a hmang ta a, defence leh foreign affair tih lohvah chuan Communist China hi Hong Kong sorkar-ah a rawn inrawlh lo tluk a ni a. Hong Kong hian executive, legislative leh judiciary lamah thuneihna vawrtawp an nei a, ram dang sorkar leh company te, international organization te nena indawr chungchangah pawh China sorkar hi a rawn inrawlh lo bawk a ni.

Hong Kong Zalenna famkim duh pawl an awm
Hong Kong Zalenna famkim duh pawl an awm

Communist China sorkar kalphung khi ţha ka ti hle a, an kal phung khi controlled democracy ni berin a lang a, hmakhawsang atangin zirtirtu an lo nei ţha a, kan Lal Isua pian hma kum 2000 vel daih atang khan Zirturtu Kunga, Confucius te an lo nei tawh a, dik taka thil tih hi lukhawng a neihzia te an lo zirtir daih tawh a, chu chu an thisenah an ţhanhnan tawh a. Ram hruaitute tha an neih tak loh hnu khan an ram leh an hnam chu an lo chau ta hle mai a, ruihhlo Opium ngawl vei an tam ta em em a, Kumpinu khan chu an ruihhlo ngawi vei takah remchanga hmangin an ram a laksak ta duai duai mai a. Japan ral a lo lian a, mirhing tam zawk Chinese ho chu pate zawk Japanin an sawp hrep a, an ching let an ching let ta a.

Chutah le, Mao Zedong @ Mao Tse-tung chuan 1949 kum khan Commnist Party of China a rawn din ta le, China hnam tluchhe tawh chu a rawn tungding leh ta a, Marxism–Leninism–Maoism hmangin riangvaite tana chanchin tha tih ang mai khan kum 50 chhung lekin China ram leh hnam rilrua palian muhil kha a han kaitho ta a le! China ram hmasawnna chu thopa zuanin a zuang ta, tlang an rawt a, kawr an hnawhkhat a, Communism tha mi hmangin China ram leh hnam chu khawvela ram ropui leh hnam ropui, hnam zahawm leh hman intodelhah an siam ta reng mai a ni. China ramah khian kutdawh pawh an awm lo hial mai thei a ni.

Africa khawmualpui leh Asia khawmualpuia mite hian kan zalenna hi kan hmang thiam lo fo va, sorkar tha lo tak tak kan hrawn fo thin a ni.

Written by Familia Fanai Lalţansanga
Dated; 8th November 2016 | Lunglei

Similar Articles

Top