You are here
Home > Zoram > HEALTH MINISTER HOVIN WORLD CANCER DAY PUALIN HUN HMAN A NI; CANCER VEITE KHUALBUK A HAWNG

HEALTH MINISTER HOVIN WORLD CANCER DAY PUALIN HUN HMAN A NI; CANCER VEITE KHUALBUK A HAWNG

HEALTH MINISTER HOVIN WORLD CANCER DAY PUALIN HUN HMAN A NI; CANCER VEITE KHUALBUK A HAWNG

Health & Family Welfare Minister Pu Lal Thanzara hovin vawiin khan Mizoram State Cancer Institute (MCSI), Zemabawkah World Cancer Day 2018 pualin hun hman a ni a; Health Minister chuan “Shelter for Cancer Patients”, cancer natna veite chawlh hahdamna tur, UD&PA Department kaltlanga building sak thar chu a hawng nghal a ni. World Cancer Day hi khawvel pumah kum tin February ni 4 ah hman thin a ni a, kuminah he ni hi Sunday-a a tlak avangin Mizoramah chuan vawiina hman tak a ni. World Cancer Day programme hi National Programme for Prevention & Control of Cancer, Diabetes, Cardiovascular Diseases & Stroke – NPCDCS, NHM leh Mizoram State Cancer Institute (MCSI) tangkawpin an buatsaih a ni.

img_0058_1517826943

Health Minister chuan Mizoram chu India rama population chhuta cancer vei tamna ber a nih thu leh, tun hnaiah cancer thenkhatah state dangin Mizoram rawn khum mahse cancer tam takah chuan sang ber nihna kan la hauh avangin a veiawm hle a ni, a ti a. Cancer ti tlem tur leh a enkawlna lamah pawh hmasawn tura sorkar pawhin nasa taka harsatna tam tak karah hma a lak chhoh thu sawiin, India hmarchhaka thenawm state engemaw zatin cancer enkawlna mumal an la neih loh laiin Mizoram chu kum 2003 daih tawhah khan cancer enkawlna changtlung Regional Cancer Centre (RCC) atana puan a lo nih tawh hnuah, tunah TCCC (Tertiary Care Cancer Centre)-ah puan a ni leh tak thu te, he centre hi khawl changkang tak tak nena thuam, khum 100 awm theihna tura ruahman a nih thu a tarlang a; hemi atan hian Rs 44.27 crore pek a nih tawh thu sawiin Minister chuan he cancer centre hi Superspeciality Cancer Centre-ah hlankai a nih theih nan project te siamin hma lak mek a nih thu a tarlang bawk a. Cancer veite khualbuk hawn tak chu damlo mangangte harsatna chhawktu a nih ngei a beisei thu sawi bawkin, a siamna kawnga hmalatu zawng zawng chungah lawmthu a sawi a ni.

img_0041_1517826930

Minister Pu Lal Thanzara chuan National Health Mission (NHM) hnuaia NPCDCS kaltlangin Population Based NCD Screening (Universal NCD Screening tia sawi bawk) kalpui mek a nih thu a tarlang bawk a. He hmalakna hnuaiah hian kum 30 chin chunglam zawng zawng chu cancer 3 (chhulhmawr, hnute, ka-chhung cancer) bakah zunthlum leh BP sang an vei leh vei loh en chhuah vek a nih tur thu a sawi a. Tunlaiin Communicable Diseases (NCD) a sawi thin heng – Cancer, Zunthlum, BP Sang, Lung natna, Stroke-te a hluar chho em em a; vei kan tam avangin vei ve lo turin tan kan lak tlan a ngai a ni, tiin Health Minister chuan nundan hrisel neih pawimawhzia a sawi a. Zuk leh hmuama fihlimte, ei leh ina fimkhurte, taksa insawizawi tamte, zu laka fihlim emaw, in nasat loh te a pawimawh tih mithiamte’n an sawi thin chu, a taka zawmtu nih tum theuh a, heng natna lo vei palh hlauh te tan pawhin hriat chhuah vat a nih theih nan inentir uar emaw inentir nachang hriat thar a tul a ni, a ti. Hemi kawngah hian tlawmngai pawl hrang hrangte, Kohhran leh Sorkar Department hrang hrangte leh media te pawhin mahni hma zawn theuhah tih theih an nei tih an hriat a, tangrual taka thawh ho a pawimawh thu a sawi a ni.

img_0044_1517826934

Vawiina hawn tak Shelter for Cancer patients hi UD&PA Department in DAY-NULM hnuaia Scheme of Shelter for Urban Homeless Scheme kaltlanga cheng nuai 20 senga an sak niin, 2.2.2016 khan bul tanin, 29.8.2017 khan sak zawh a ni a, RCC building chhawng thum awm niin, kitchen-cum-dining hall pakhat, family room pakhat leh tuizem 2000 litre dawng a awm tel bakah a satu department hian contract chhunga tello khum 15 leh mattress, blanket, bed sheet leh lukham te an dah tel a ni. Shelter for Cancer patients hi Mizoram Cancer Care Foundation (MCCF) leh Health Department ten MOU an sign angin MCCF ten an enkawl chho dawn a ni. 

img_0034_1517826927

World Cancer Day pual inkhawm hi Dr. T. Lalhmangaihi, Director, H&ME chuan kaihruaiin, Dr. Lalrozama, Mission Director, National Health Mission, Dr. Eric Zomawia, State Nodal Officer (NCD) NPCDCS, Dr. Jeremy L. Pautu, Medical Oncologist, MSCU, Zemabawk, Pu C. Zaihmingthanga, President, MCCF leh Rev. Dr. F. Sangkhuma, Vice President, Cancer Society of Mizoram (CSM) te hnen atangin thusawi ngaihthlak a ni a. Hun hi Dr. Zoramthanga, Director, MSCI, Zemabawk chuan lawmthu saiin a khar a ni.

img_9979_1517826947

Vawiin tlai hian Health Minister hovin lndia rama cancer lama milar leh thiam engemawzat nen Consultative Expert Committee Meeting neih a ni dawn a, hetah hian Mizoramah Cancer Hospital changtlung tak din a nih theih dan tur leh mipuite zinga nasa zawka awareness pek dan tur te ngaihtuah a ni ang. 

 img_9981_1517826952

cancer_khualbuk_1517826919

 

WRITTEN BY EMILY LALRINPUII, MIS, IPRO

DATED: 5TH FEBRUARY 2018, 4:06 PM | LANGUAGE: MIZO

 

Similar Articles

Top