You are here
Home > World News > HACKING HI A TITU FINFIAH HARSA TAK A NI- DONALD TRUMP

HACKING HI A TITU FINFIAH HARSA TAK A NI- DONALD TRUMP

HACKING HI A TITU FINFIAH HARSA TAK A NI- DONALD TRUMP

US President Barack Obama thupek angin US Democratic Party leh Clinton campaign thuruk ruchhuaktu nia puh Russia palai 35 leh an chhungte chuan kum thar ni tak khan America ram an chhuahsan tak thu Russia news agencies te chuan an puang.

_93202481_hi037055099

President-elect Trump chuan he inpuhna thuruk a la puan chian tur thu a sawi

Heng an hnawhchhuah tak palaite leh an chhungte hi phur hawtu thlawhnate hi Russia President leh sorkar mi pawimawh bikte phur thintu Rossiya airline special flight a nih thu TASS news agency chuan a tarlang.

Obama thupekah khan heng hacking-a inhnamhnawih nia puh palai 35 leh an chhungte hi thupek tihchhuah atanga darkar 72 hma ngeia America ram chhuahsan tura hriattir an ni.

Russian foreign ministry chuan Russia rama America ram palai 35 hnawtchhuak ve nghal turin rawtna a thlen a, mahse Russian president Vladimir Putin chuan hnawhchhuh ve nghal rup rup a tum loh thu sawiin ram palaite zahawmte tihnep a tum loh thu leh America ram palaite leh an chhungte thlamuang taka kumthar an hman a duhsak thu a sawi a, America nen inlaichinna țha neih dan ngaithuah a duh thu a sawi ta hlauh zawk a ni.

Donald Trump chuan Vladimir Putin-a’n a thungrul ve nghal mai lo chu a fak hle a, Putin hi  mi fel tak a ni tih ka hriatna a rei tawh a ni, a ti.

_93202479_hi037061566

Kum hlui thlah zan khan Donald Trump chuan, hacking chungchanga mite hriat loh a hriat kilh kelh thu leh a la puan tur thu sawiin, “ Hacking chungchang hi ka hre teuh va, hacking hi a titu finfiah harsa tak mai a niin mi dang tih zawk pawh a ni mai thei a ni, US leh Russia inkar boruak pawh hi  a danglam leh thut mai thei bawk a ni, a ti.

A thil hriat chu chipchiar taka sawi tura an ngenna chu hnarin Donald Trump chuan Thawhlehni-ah emaw Nilaini-ah emaw a puan tur thu a sawi a, thuruk pawimawh dahțhat nan chuan computer hi a rintlak lohva, computer hi a him lo tih kan hriat a țha a, thuruk vawrtawp hi chu lehkhaa dah mai a that zawk thu a sawi a ni.

Similar Articles

Top