You are here
Home > Zoram > GOVERNOR LEH CHIEF MINISTER HOVIN NEW INDIA SIAM TURA INTIAMNA NI HMAN A NI

GOVERNOR LEH CHIEF MINISTER HOVIN NEW INDIA SIAM TURA INTIAMNA NI HMAN A NI

GOVERNOR LEH CHIEF MINISTER HOVIN NEW INDIA SIAM TURA INTIAMNA NI HMAN A NI

Vawiin chawhma khan Lal Thanhawla Auditorium-ah India Independence Day 2017 lawmna kalzel puala buatsaih, Kum 2022 lo thlen hma a, ‘India thar’ siam tura khua leh tui te inhlan thar leh intiam thar lehna ni, ‘Sankalp Parv’ chu Mizoram Governor Lt Gen Nirbhay Sharma ( Retd) leh Mizoram Chief Minister Pu Lal Thanawla te uapna hnuaiah hlawhtling taka hman a ni. 

img_4207_1505466987

Governor Lt. Gen. Nirbhay Sharma (Retd.) chuan mitin hian zalenna hlut zia kan hriathiam a pawimawh a ti a. Chumi hrethiam tura Sankalp Parv (Festival of Resolve) buatsaih a ni chu hmalakna pawimawh tak a nih thu a sawi a. New India – ram fai, mirethei, eirukna, firfiak leh chi leh chi  inthliarna te awm lohna hmun a siam tur chuan mitin kan tanrual a ngai a ti. Mizoramah chuan khawtlang an inlungrualin,  tlawmngaipawl ten ram hmasawn nan nasa takin hma an la, tha pawh an thawh a ti a. Mizoramah Chi leh chi inthliarna awm ve lo chu ram dangte tana entawn tlak a nih thu a sawi. 

img_4203_1505466993

Act East Policy ti hlawtling tur chuan Hmarchhiak biala chengte an hmasawn phawt a ngai tiin  Mizoram hmasawn nan – a chhunga cheng mipuite pawh an hrisel hmasak a ngai a ni, a ti. Vaihlo zuk leh hmuam, ruihlo vanga talbuai leh zu ngawl veina chu Mizo thlalaite chelh bettu, annih tur ang nih tir thei lo tu a ni a; nun hrisel leh kawng dik, Mizo thalai ten an zawh phawt chuan midang te aia hlawhtling zawk turin theihna an nei  tih a sawi a.  “Hmasawnna sang zawk tawng baw tur chuan Hnam dang te hnen atanga zirtur kan neih – tawng, khawsak dan phung, tihdan tha zawk, hnamdang culture leh a dang te pawh zir kan huam a, kan khawvel tukverh te zau zawka hawngin  Sakhaw dangte nena indawhtawnna  pawh kan neih a pawimawh hle a ni”,  a ti. 

img_4202_1505466996

Chief Minister Pu Lal Thanhawla chuan Indenpendence Day lawmna hmang tangkai a, ram mipui te hmasawnna atan leh insiamthatna tura zirtirna remchang tak, Sankalp Parv, Prime Minister Pu narendra Modi-an a duangchhuak chu thil awmze nei tak a ni a ti a. Kum 2022 thlen hma a ‘India Thar’ siamna tura rampum huapa tih hlawhtlin tur hmachhawp pasarih zinga engemawh zat chu vanneihthlak takin Mizoramah tih hlawhtlin a  ni tawh a; a lawmawm in a chhuanawm hle a ni a ti. 

img_4227_1505466982

Thianghlimna kawngah Swacch Bharat hma daih atanga Mizoram in kawngthui tak a lo zawh tawh avangin  nasa takin hma a sawn a; Chi leh chi inthliarna phei chu Mizoramah a awm lo a, sakhuanna avanga inenhranna a awm hek lova; remna leh muanna kawngah phei chuan hmahruaitu a nih thu a sawi a. “Hnam tlemte kan nihna angin Corruption hi tih reh harsa a ni lova; he thilah hian sawrkar in theihtawp a chhuah a, mipui thlawpna leh tanpuina in corruption awmlohna state nih kan tum mek a. Reitheihna avanga mi tam zawk harsatna te pawh  NLUP leh NEPD hmanga tih dam leh  chhawk zangkhai a ni mek a; eichawp thawk chhuak tawk tawk atanga ei leh bara intodelh – Subsistence Economy atanga Market Economy a pakkai turin kan sawrkar chuan theihtawp a chhuak mek”,  a ti. 

img_4210_1505466991

Mizoram Chief Minister Pu Lal Thanhawla chuan National Integration atana pawimawh hmasa nia a hriat  tarlangin,  ” India ram hmun hrang hrang ka fanna a thil vanduaithlak tak ka hmuh chu, ram hruaitu leh hna sang tak thawk zingah mi tamtak chu India ram chhung aia rampawn – US, UK leh Europe hrechiang zawk te an ni a. Heng mi te hian Indian tih kan sawi hian Indo-Aryans, Dravidians, Tibeto-mongoloid stocks leh aboriginal tribes tih te a huam bakah heng Indian hnam peng hrang hrang te chenna pawh an hriatchian viau a ngai a. Unity in diversity kan chakna tawngka a ti mai lova an rilru a an tuh a ngai a; kan inhriatchian zawk na atan, kan lo innel zawk nan  leh kan zaa inpumkhatna atan cultural exchange tam zawk kan neih a ngai in ka hria’, a ti. 

img_4195_1505467004

Sankalp Parv hi Mizoramah chuan Ministry Of information & Broadcasting leh I&PR tangkawpin an buatsaih a ni a. He hunah hian India thar siam tura intiamna hun, Mizoram Governor Lt Gen Nirbhay Sharma ( Retd) chuan nei in Chief Minister Pu Lal Thanhawla’n dawhsan ah a tawiawm a,mipui te pawn  an zawm a ni. He Programme hi Indian Classical Music concert, Mizo Hnamlam chi hrang hrang, A huhova zai leh hnamdang dang hlasak ngaihthlakna hun te a hnawhkhah a ni a. Sankalp Parv a New India Movement 2017-2022 a intiamkamna thuthlung pasarih chu : Kum 2022 ral hma a   India ram – Ramfai, Rethei awmlohna, Eiruk leh hlemhletna awmlohna, Firfiaka chet leh pawisawilo chunga thahrum thawh awm lohna, hnam leh sakhuanna avanga inenhranna leh innghaisakna awmlohna bakah chi leh chi thila inthliarna awmlohna hmuna siam a ni.

img_4192_1505467009

WRITTEN BY MALSAWMSANGA, MIS, PIO TO CHIEF MINISTER

DATED: 15TH SEPTEMBER 2017, 2:46 PM | LANGUAGE: MIZO

 

Similar Articles

Top