You are here
Home > CCT Robawm > GERMAN RAL RUN – Familia Fanai Lalţansanga

GERMAN RAL RUN – Familia Fanai Lalţansanga

GERMAN RAL RUN – Familia Fanai Lalţansanga

Lunglei Bazar Veng branch YMA bultuma Mapuia of Leitlang Pictures siam  German rallian music video thawnthu lemchan kha ‘fact’ a ni lo ve tih ka ziak tel kher a.

GERMAN RAL RUN
Chulai tě chu hre thiam lo leh ngaithiam thei lovin, Epis Termology chuan,Mizo tlangval te France ram an kal hi “HISTORICAL FACT” dik tak ngei a ni e, tiin hlum bela bai chhuan phul buah buah khawpa so liam angin a rawn luangliam ta chiam mai a!. Sir Muana Chhakchhuak khan mi rawn kap bawk a. “Fanai pa ropui hian a hriat sual ve tlat mai.German ral lian hi ‘fact’ ngei a ni e…. Mizo tlangval 2000 chuang zet lammuala an han intlar thup mai kha a ropui a ni ang.German ho chu an khawngaihthlak dawn mang e” an ti e, a’n tih kha” tiin Fanai pa “ropui” title mi rawn pe mai kha ‘satirical’ a ni tih ka vaibel tih ang tlukin ka chiang hle mai si a, ka helhin ka pai dam thei ta lo va. “Truth prevails” an tih ang khan thutak & thu dik ka han hrilh fiah ang e’ ka ti ta a,hetiang hian ka han chhang ta a ni. 

1782153_610214152408797_623013325730278270_n
France ramah khan Mizo tlangval an zuk kal ngei a, ka pute 2, a hnua pastor lo ni ve ve ta, Presbyterian Pastor Langlura leh Baptist pastor Zathanga te,  pawh an zuk kal ve a, an thirfian rawn hawn pawh ka la dah ţha a, ka la roh em em a ni.

121qtyq

Mahse nula lungleng hla phuahtu chuan a “poetic lisence” hmangin German ral lian tawna silai chelek angin a rawn phuah ta a, chu lai chu history a ni lova, fact a ni hek lo ka tihna a ni. Ka pute kha chu labour angin a ni an kal ni! Hla chu art a ni ta a, suangtuahna@imagination hmangin hla thu a siam ta a, a thluk nen a lo inrem em lah tak a, kan thinlugah a luangliam ta vek ka tihna mai zawk a ni e. 

mizo ral runte

1917 kumtir lamah sorkarin Lusei tlangval 2000 lai French ram kal turin an la a,Lunglei bial atangin 500 an duh a, Mi 425 chiah an kal thei a. Aizawl bial atangin mi 1500 an duh a. Aizawlah chuan kal chak an tam a, an zingah Saia an tih, pa tě reuh te chu a intlar ve a, a upat lutuk tawh avangin an lo hnâwl a, a lehlamah a rukin a intlar leh a.A luhlul em avangin Bawrhsap chuan a intlar chhan a zawhtir ta hial a. “He indonaah hian ka kal ngei tur a ni,phal lo mah ula,ka kal tho tho ang, a upa tawh lutuk a,ral kap tlak a ni tawh lo min tih leh Laipui mu-ah min thun tel ang a, kan Kaisar mi sual pa,German lalpa chu ka deng hlum dawn a ni” a ti ta tawn tawn reuh va! Bawrhsap chuan, “A ni tak maw, kal ber tur lo zuk ni tak che a” a ti a, a kal ve ta a ni. France ram kalte hi thi ngei turin an ngai a; Hla-in

Hnam tin nau ang ţahna a thleng ta e,
Sappui dar feng an famna German dai-ah;
Awi ka di lungrun ka phal love,an ti a.

Chin Hills-ah chuan an lo huaisen deuh bawk a, kal duh lo vin Kumpinu lakah an hel thut a, Halkha-ah phei chuan Sap sipai awmna an kap hman. Falam bialah tlangval 3000 zenzawnin Sap sipai beih an tum lai takin Sap ho hnena thu lo rawlruktu an awm avangin an inkap hman lo! Kelkang hlimsangho AR lammual laih sazai an pek ang deuh khan Chinmual laih sazai an hmu. Mara lam pi leh pu te an lo huai leh tlat pek a, “Khung chen chen kan zu kalin, damin kan haw leh lovang;hetah mahni ĭn lumah thih kan duh zawk” an ti tlat a, an hel ta a.Kum 1918-19 thlengin Sap sipai chuan an bei ta a.He buaina hi ‘Zawngling Run’ an ti.

Lunglei atangin ni 17.4.1917 ah Aizawl panin an chhuak a, ke-in ni 8 an kal a, Aizawlah ni 3 an cham a, Lushai Labour Corps tih an niin an cham chhung hian thla 2 hlawh an pe a. Hetah hian inzirtir dan dik lo teaching method deuh Lunglei Chanmari phei-a an intlarna-ah an lo hmang a ni awm e!. Left turn tih chuan Theiriat tlang lam hawi tur an ti a, Aizawl lammualah an han intlar chu Left turn tih khan Theiriat tlang a lo awm tawh si lo va, an buai deuh nâk hlawm a ni awm e.

Sorkar leh anmahni thlahtute nen Khuangpui leh Baja nen ropui takin Aizawl lammualah an thlah liam ta a;

Khuangpui, Baja ena Mual kan liam
Hranglianthanpan zaiin kan thlah Ai tlangah;
Chung Pathian zarah dam turin,
An awi liamta Khuangpui nen;
Lal Bawrhsap pan kallai tiam ta si e…..

A thenin April ni 28,-ah Silchar panin an liam thla a,bangla tinah riakin an vaiin Silchar an thleng rual a,ni 10 an cham a,bungbel te,diar te, pheikhawk,kekawr leh thil dang an dawng a. Pazawna Thehlep khua chu a mah a tâwi si a, Parandi a dâwn chu a sěi si a, a fual zawng leh a bân sei lutuk chu khukri-in a tân hmawk mai,an ti.A number sawi dan chu- Hreipui ang leh artui ang a ti a, chu chu 70 a ni. Chhim leh hmar mi intihthiam lohva , Hmar lam mi inbuan chak Thanherha chu Chhim lam mi Muka a hneh .

May ni 15-ah Silchar atangin rel(train) in an kal ta a.Silchar thlanglamah pawh kawngpui a la bel ţha hle tih kha a kal tam zawkte hriat dan a ni chauh mai si a, rail a han kalsawn chu ui û ang leh bawngpui hur bû angin an saparâk nasa hle a ni awm e. An kal rei deuh hnu chuan an lo tlangnelin an lo hlim thei ta deuh va.Hla an phuah nghal zel bawk a.

Vai vai ak kan lenna tlang zel maw
Sappui siam sa rikhum Rel ah kan chuang e;
Lungkham thanghniangi a tel love an ti a,an hlim hlawm ta hle a ni.

Lawngin Gualando,chuta ţang chuan rail-in Calcutta Howrah an thleng a, May ni 20-ah Bombay an thleng ta ngei a. In lian pui maiah hian mi 50 zelin an khalhlutin an khungkhawm ta a.Kawngka bulah chuan thawmhnaw zawng zawng an hlihtir a, saruak ngal ngat mai hian an dintir ta a. Doctor chuan a han endik a, an dul te, ,an ţhalbe te an han dap ta tak tak a,an thil kha an han pawh zutsak leh ta nghal a. Pa pakhat zak lutuk chuan “A va’n zia lo em em ve maw le” a ti bul bul a.Silchara an cham chhunga ţhiani te lane-a nawhchizuar lo rimte zingah hri ţha lo vei hmante an lo awm ngei lah tak a,damdawiinah an dah nghal hmiah hmiah mai a ni.

Bombay atanga tuifinriata lawnga an kal chu an rûi nasa hle a, Durtlang khua Sawnlala a khungcher bo hmiah!.Arabian tuipui-ah thlipui an nangching a,an lawng chu a bûk nasa ta mai a, an chawi ei laite hi dailuah bel nen,chaw bel nen,an chawthleng nen kil khatah an lumkhawm leh rûih mai thin a! Pu Lianthuama chuam , “Mâwng lam hi lû lam aiin tawng chen chenin a sâng ta mai ţhin a, kâ lamah kan ě lek lek mai a ni” a ti.Mizo kut hlei ngang hi kan ni a, an lawng chuanna Captain Sap pindan fang kual vel pawhin “Ka mi phurhte chu zâwng rual an âng ber e” a ti ta hial reng a ni. Hnathawh tur awm hlâwl si lo, âwm hle hle thiam lo khan banga râwng hnawih kheuh khawh talah an lo ramţang a ni ber e.An chuanna lawng kha rawng var hlâka hnawih thar diâi a ni a, Mizoho ban phak tawk chu an hiat râng zo vek!

June ni 20-ah France ram Merseiles khawpui an thleng ta.saruakin an inbuala kahchikin an kap vek.an inthendarh ta a,mi thenkhat Mesopotamia ramah thenkhat Rome khawpui-ah an kal.Monchy-au-bois an thleng a. Anţam an hmu a, a chi an la a,French anţam an tih hi a lo ni ta. Lianmura Vai sual huai hi a awm a.Tui dawhna hmunah Vai bân a vuak tliahsak a, Vai an hlau ta lo.Lusei hote huai taka Vai hlau lo tura fuih tlattu chu Needham Sap a ni.Luseiho chem a khâwn khâwm a, Vai an sah hlum vek a hlauh vang a ni.

Thla a lo sik a, Hrik-ţhah an ngah ta em em mai a, Khual-en khua pa pakhat phu-la-len kawr chu an han hlip a, a hrikpui khuangchawi kha han deh hlum sen chi ni hek lo! A han thing phâwrh phâwrh a, a vela hnahthel rǒ te chu a ri ţhawt ţhawt thei a ni. Khua kha a han vawt mai mai khawp a,Pu Lianthuama bawk chuan a tia lawm, “Kut leh ke hmâwr hi pangâng hling hnai la ang maiin a na chik ut ut mai a, duhthu min samtir sela, eng nge I duh ber ti sela,Kahpathir ling hûm” ka ti ang a ti.Heta an awm lai hian Zosap Pu Buanga’n a tlawh.An meihawl rawh tur kal lai laipui mu siperin thingzar a fuh hlauh va, a thingzar tliak chuan Mizo pakhat a vawhlum der mai!Thankhuma’n hla a phuahsak a;

Virthlii lungmawlin a her sual e,
Laldang vangkhua kan chhanna lei do daiah;
Tum loh Rih tlangpui a liam ta e!

April 17, 1918 chuan an in sawn a, India rama haw turin an insiam a,Merseilles April ni 18-ah an lut leh ta a, Lusei-ho an innghakkhawm leh vek ta a ni. Mizo leh Vai leh Naga intihbuai zan a tam mai a.Nikhat chu Mizo leh Naga-pa chawchhumna thûk inchuhin an innghirngho deuh va.Naga pa chuan chaw bel a dah lawk a,insual tur chuan a inlěk phěk ta a.Mizo pa chuan a kianga thingrem phel,buhtleia siam sei deuh fe hi a lek a, Naga pa hnarkawnah tak mai chuan a hěm tak chawrh mai a,a kun thĭ pa pur pur mai a ni.

Lawng bawkin an kal a, Portsaid an thleng a, Suez-ah an cham leh a.Hetah hian Sap-hovin French ram kal leh turin an sawm a. London leh Sap ram fan puiah leh thawk rei deuh turin an sawm leh a. “London hmuh ai chuan kan tuidawn leh arbâwm pawh hmuh kan duk zawk” an lo ti a ni awm e. May ni 31,1918-ah Bombay an rawn thleng leh a, Rail-in Assam an ram pan leh ta ngat ngat mai a, Bramaputra an thlen chuan ni 4 chhung Khasi leh Naga leh Mizo valrual 1500 zet chuan lawngin ni 4 an kal leh a.Chhun lai tak dar 12 -ah an thlen chin khaw remchang apiangah chawlin darkar khat luipui kam khawmuala chaw chhumna hun an pe thin a. Thing tuah tur an pek si loh avangin mahnia inngaihtuah chawpa fawm chawp a ngai ta si a,khawmual ĭn hnaih ber leh an huan pal chuan a tuar ţhin a ni.

Chutianga an chawlh lailawk hlan chuan Vai thil zuarte chuan ei tur tûi hnâi tak tak an rawn zuar thin a. Naga ho chuan Vaiho thil ken ai chuan an ui hruai kha an melh ngun ta ţhin a, an han vawthlu tawp a,an hnam danin mahni dawmna lai ţheuha a sa kha an châng ta thin a.

Nikhat chu Tlang pawng deuhvah hian nawhchizuar pakhat hian a rawn hûi zauh mai a,Naga pa chuan a pân nghal ta chat a, a hnute chu a’n ţhamsak ta hlawih hlawih a,thil dang tizui ta lo chuan a khawngkhar chu a chaw chhum nan a pu thla ta nghek mai a,mi dang lo kal chuan a ĭn chu an pawtţhiat ta sawk sawk mai bawk a.Amah dawr tur beiseia hui sual let der Nawhchizuar-lung- mawli hrilhai chu a ţap a ţap ta mai a ni.

Tumkhat leh chu theihai zuartu hian ui a rawn hruai a. Nagaho chuan chu ui chu leilet buh thar rang hmin dawn dawn zingah hian buh dim hlek lo hian an han um tak tak mai chu…thui deuh an um hnu chuan an vawthlu ta nge nge a, a bawp leh a darte chu an rawn lek chhuak ta fur mai a ni!. Naga ho thil tihdan chu Mizo ho chuan an thik ve ta a, kel leh arpuite an philsak ta hlawm bawk a ni.

Gauhati-ah hian Labour Corps Office a awm a, lehkha pawimawh tifel vek hnuah Silchar an pan leh ta a.June ni18 khan an vaiin Aizawl a rualin an lut a.Chamari kawnah mi tam takin an lo hmuak a,sipai Band party ten hma an hruai a.AR lammual an lut a.Ropui takin an lo lawm a ni..Heta tang hian mahni khaw lam ţheuh panin an tindarh ta a ni. Thenkhat chuan Rs.1000/- te, Rs.250/- lai te an hawn a,tangkapui an dawng a, an dam chhung lei man kumtin Rs 2 an awl hlauh a ni. Pu Palaia Ralvawng khua chu Sap ram chu a nuam em tiin an zawt a, “A nuam bik lo,thinglukham put tur pawh awm ve hlei lo” tiin a chhang. Kunga khawbel khua chuan, “Kan kalna chu a hla khawp a,Pawl dangte kalna ai pawin a hla a ni.Lehkhathawn pawh a thleng pha chang chang a ni” a ti.

Kal kawngah leh ral vanga thi hriat theih chin te 1)Thangţhianga Sertlang 2)Sangkunga Siallukawt 3)Chama Mualthuam 4). Tungkawlha 5) Sawnlala Durtlang 6)Tlaungchhawna Muallianpui 7). Mi 1 hirat chian loh

Ka nu lungphang mi ring lawm ni?
Zerman ral lian kulhpui dai kan tawn niin;
A surin ngen mu a sur chum chum.

Thing tin sawi dimin min iang zo lo,
Val kan sawi dim khuangpui ring hluam hluam karan
Doral an nem zel e saw hmaran.

Sikim Manding sap i lungmawl e,
German Rallian tawnah ka lungdi
Fam atan ka phal lo ve.

Awi ka nu e,Chhimtlang hawi kan buk thlamah;
Zun ngai uai reng renga ram tuan ni len chu!

(Ref; K.Hrangkima,J.F,& K.Zawla etc.)

Similar Articles

Top