You are here
Home > World News > FIDEL CASTRO AN VUI RUAL HIAN SOCIALISM HI VUI TEL NGHAL SE!

FIDEL CASTRO AN VUI RUAL HIAN SOCIALISM HI VUI TEL NGHAL SE!

Dictator pakhat chu a lo boral leh ta phawt a, Cuba dictator Fidel Castro an vui rual hian khawvel mi tam tak tiretheitu Socialism hi khawvel atang hian vui tel ngal ni teh mai se la aw! A va țha dawn teh reng em!

Van ramah hian mihring duhthusam zawng zawng awm anga kan hmehbel ang hian Karl Marx ideology Socialism-ah  hian khawtlang thil ințawma thil țha zawng zawng awm khawm tura a hmehbelah hian a tak takah chuan thil țha reng reng a lo awm lo va, thuneitu ui hum lek hian an ram mipuite thunun theihna turin duhthusam ram an sawi hmuh a, anmahni mi tlemte chauh thuneihna pumpuhlum an neih theihna tur mai a lo ni si!

Burma ramah General Newin chuan Burmese Ways of Socialism sawimawiin kum 40 deuh thaw thuneihna a pumhmawma, a ram mipuite chu khawvel hmuhsit leh ngaihnepah a chhuah a, English hluihlawnin Burmese a zirtir a, khawvel ram dangah hmantlak a ni si lo!

India ramah chuan BJP leh Hindu kulmukho vin English hi hluihlawn tum sa teh mahse, Saptawng thiam em em leh Saptawng pawimawhna hria Jawaharlal Nehru-a’n English pawimawhzia hria in English hi a hum hram hram a, tunah chuan India thalaite hi khawvela English hnathawhnaa hmang thei thalai tam berah a chhuah ta a, a va ropui em!

Mizorama thalai English thiam lo te khawvel hi a lo va zim tak em! Tukverh awm lo inchhung thima khungkawm ang lek an ni a, ar bawm tawta khungkhawm hi ka tehkhin ber! TV an en tlawk tlawk a, an TV en, dubbed film, Saptawng leh Vaitawng thiam mang lo ho Mizo tawnga an lehlin atang hian finna an pawhchuak em! Hnai lo ve! An khawvel hi a va zimin a va lainatawm tehlul em! Chutiang dubbed film leh lehlin film en ho hian fing an la ti em em leh ta nghal!

British Labour Party hruaitu Jeremy Corbyn chuan, Fidel Castro boralna hian kum zabi 20-naa socialism chu a boralpui ta a ni” a ti.

 

Karl Marx khan Capital: Critique of Political Economy  tih lehkhabu a lo ziak a, khawvel a sawinghing a, a thu han ena țha tak ni awma lang, mahse a tak taka hman hlawhtlin theih ni si lo kha a ni a, kum zabi 20-naah khan he thuthlung hi khawvelin a buapui a, mahse an hlawhtlinpui lo  a ni. communist ram leh socialist ram hi an tluchhe ngei ngei a ni. Engvang nge kan tih chuan mihring hi mahni hmasial tak thil nung kan lo ni a, mahni thenawm khaw vengte hi hmangaih tak angin langin inti Farisai thin mah ila, a tak takah chuan  kan thenawm khawvengte aia neinung nih hi kan lo duh vek hlawm a. A huhova dinchhuah ai chuan mahnia dinchhuah hi kan lo duh vek! Hnatlanga hna kan han thawh hian țhahnem kan lo ngai tak tak lem lo. Run dalin thil kan ti mai mai. Kan țhenawm khawvengte hian min dinchhuah khalh ang tih hi kan hlauh ber a ni! British mathematician leh philosopher ropui Bertrand Russell thuziak pakhat ka chhiar tawh a, mahni thenawm khawveng te neih ve loh neih hi dam man a awm hliah hliah a ni, a ti. Kan Lal Isua khan nangmah i inhmangaih angin i thenawm khawvengte i hmangaih tur a ni a ti tak naa mahni thenawm khawveng hmangaih aiin ram thim ram thara mite hmangaih kha a awlsam daih zawk a ni.

India ramah pawh Jawaharlal Nehru kha socialism a lotuipui rei lutuk a, hma kan sawn tur angin hma kan sawn thei lo va, Dr.Manmohan Singh-an economic liberation a rawn siam hnu khan hma kan sawn hle a ni. Tuikuk Pathian siam theih loh tih hi Tuikuk chauh sawina a ni lo, tungchhova kal mihring zingah siamtheih loh tawp hi kan tam mai. Chungho zai ngai reng renga kan awm chuan a ram pum huapin kan hnufum thin  a lo ni. Chu chu socialism tehkhinna tha tak a ni a. A ngaihna hria leh hmangchang hria te kan tibahlah tur  a ni lo. A ngaihna hria chu dingchhuak mai rawh se. Chu chu Abramhan Lincoln te hun lai khan an lo hre daih tawh a, mi rethei hmakhua ngaiin mi hausa kan hrek tur a ni lo, a lo ti daih tawh. America ramah hian a ngaihna hria te dinchhuahna tur an dal ve ngai lo va, America ramah hian mi hausa leh dingchhuak an tam ber reng a ni. Chu chu a ni, ‘American dream’ an tih chu.

Mizoramah pawh economic policy thar an duang mek a, NEDP-ah hi chuan a ngaihna hria leh mi taima ding chhuak thei turin policy hi Pu Benjamina te hian duangchhuak mawlh teh se. A ngaihna hre lo chu hnufum mai teh se. Socialism hun laia India ram puma Ambassador car chauh siam phalna License Raj hun kha tawp tawh mawlh teh se.

Similar Articles

Top