You are here
Home > CCT Robawm > DULLAI SIAL LEH VANKAL SIAL – ART REVIEW by Familia Fanai Lalţansanga

DULLAI SIAL LEH VANKAL SIAL – ART REVIEW by Familia Fanai Lalţansanga

DULLAI SIAL LEH VANKAL SIAL – ART REVIEW by Familia Fanai Lalţansanga

He painting ‘Dullai Sial leh Vankal Sial’ hi Mizo ran vulh  thawnthu ngaihnawm tak behchhana kum 1987-a Rosiamliana Ralte-in acrylic  hmanga paper, 32″ × 24″ a hlaia a ziak a ni a.  

12647475_134216533626423_1140056502095571796_n (1)

Ani hi thingtlang atanga education-in  a rilru mit a tihvar, mahnia inhaichhuak, mi puitling a inchherchhuak leh mi pakhat tling a ni a. Thu a han sawi tak tak hi chuan a thusawi a piang hi a dik vek emaw tih tur khawpin a ni thluam vek mai a ni.

12647475_134216533626423_1140056502095571796_n

Kum 1988 Feraury ni 17-20 inkar khan Aijal Club-ah 1st Mizoram State Art Exhibition ‘88@ Lemziak Enpui buatsaih a ni a, chutah chuan Mizo lemziak thiante kutchhuak 288 phochhuah niin Rosiamlian Ralte hian a lemziak 20 a rawn pholang ve ta. Tuna kan chai tur Dullai Sial leh Vankal Sial hi hemi ţuma a lemziak a phochhuah pakhat a ni a. He art exhibition-a lemziak phochhuahte hi Vanneihtluanga@Natlua khan Vanglaini Ngaihdan column-ah khan a rawn review reng bawk a, chhiar manhla tak a ni.

Rosiamliana Ralte hi lehkha thiam tih takah Mizo nunhlui hi a lo zir nasa a, chunga a thil zirte chu lemziak hmangin a phochhuak ta, a lemziak entute rilru mitthla-ah hmanlai Mizo nunhlui leh thawnthute kha fiah leh chiang takin a lo lang ta iar iar mai a ni.

He Lemziak Engpui-a Rosiamliana Ralte kutchhuakte hian ka ngaihtuahna a chawktho nasa mai a, sekibuhchhuak lem te a rawn ziak a, ka lo suangtuah ngai reng reng loh Seki a tanga buhchangrum leh sa a lo chhuak zeih zeih tur chu ka lo mitthla thiam ta a ni. He lemziak hian hmanlai kan pi leh pute buhchangrum leh sa an lo rawp tur zia pawh min suangtuahtir a, an dinhmin harsatdan tur pawh min ngaithuahchhuahtir nasa a, sekibuhchhuak kha tunlai Kristiante’n Vanram kan ngai ang hialin an lo thlakhlelh ber an duhaisam leh an lungkham ber chu a lo ni dawn reng mai.

A lemziak dang leh pakhat Pasalţha te Ropuina ( Heroic Fight of the Braves) a tih, kawr-a leilawn mal zawha pasaltha pahnih insat tura chempui nen an intin ren rawn lai lemziak pawh khan Ralte pasalţhate chanchin min ngaihtuahchhuahtir nasa hle a ni.

K.Zawla ziak dan chuan Ralte hnam reng reng hi Thahdo hnam atanga chhuak an ni a, Chalbawka fapa Chalchhunga Muallunah a lal a, Dobula fapa Renghanga Suaiah a lal. Bungsuta Haimualah a lal.

Suaia Kawlni an lal lai hian ţam rapthlak ber leh nasa ber, “ Thingpui ţam” an tih chu kum thum a zawnin a tla a. Mihring leh ran ei tur pawh a awm loh avangin an thi nasa em em a. Vawkpui chaw ngen pawh pal nghengin a ding a, nguk lovin a ţhenin a ţhen tlawk tlawk chauh a ni tiin upate’n an sawi thin.

Ralte hnahthlakho hian lal hran an nei a, an indo fo va, ankhua te pawh an inluahchhawk fovin a lang a ni. Siakengho khuate kha Kawlniho khua a lo ni leh a. Indo chak zawk apiangin  khua an luah thin ni berin a lang.

Vawi khat chu Saihmuna Bungsutho chuan Haimuala Siakengho chu an tihduhdah luattuk avangin , an unau khaw danga mite’n an ţanpui a, bungsutho chu an do va, bawiah an siam ta a. Bungsut se talh apiangin  a khêl an hersak a, vawk talh apiangin a dar chu Siakeng hotu hnenah an pe a. bungsutho chuan an ning ta a, an unaute hnenah an zualko ta a. Kawlniho chuan Bungsut chu Siakeng bawi ata chhanchhuah an tum ta a ni.

Hetih lai hianBungsut zinga an mi huai leh chak chu Darbunga a ni a, ani chu Kawlniho chuan an fuih ta a, “ Siakenghovin se khel her an rawn tum leh hunah lo phal lo la, an lak luih dawn chuan se khelin lo hlap hrep ang che,” an ti a. Siakengho chuan bungsut se khel chu an rawn la leh dawn a, Darbunga chuan se khel chuan a lo hlap ta hrep hlawm mai a. Anniho chu an thinur hle a, an tlan tau ta a, indo an puang ve ve ta a ni.

AN INDO THU; Hnam unau ţangho fo an nih avangin, chhechham meuhvin indo dan tur an rawt ta a. Heti hian an ti a, “ Mipui inbei lovin, khua pawh inrunsak lo vang: hman lai indo angin pasalţha leilawnah intawk rawh se. A daih lo hmasa chu an tlawm zawk a ni ang. He dan bawhchhia apiang, Ni leh Thla-in tlakpui rawh se,” ti meuhvin chhia an chham tawn ta a. Leilawn mal zawha insahthlak tur an ti a. An mi huaisente chu an buatsaih ve ve a. A huai ber leh chak ber chu hnehtu atan an khek ve ve a.

Saihmun Darbunga hi Kawlniho huaisen chhuantawlawl a ni a. Haimual Suangsapuia hi Siakengho chhuantawlawl mi huaisen a ni thung a. Thla khatah vawi khat an intawk zel dawn a ni. Kawlni mi huaisenho chuan an daih ta lo va, hnuhnung ber atana an khek Darbunga chhuah a lo ţul ta tlat mai a; mahse a lo chak kher mai a, a bitum apaing a sat thla ta zel mai a, Suangsapuia pawh chuan a hneh ta lo va. kawlniho chu hnehtu an ni ta a, an hlim hle a, hla an phuah a:-

Suai hnuaiah Vangkhua ka siam,

Akhua kipin ai ruan e,

Suangpapui a rang ka thah,

Ka do cheng hnuaisiah ing e.” an ti a.

Siakengho tlawm ta mai chu, tlawm an ngai em em a, Thlanrawn lal Chawnglula, Thangmanga pa an ţahawh ta a. “ Kan chhechham avangin Kawlniho kan beih a thiang tawh si lo va, nang kan unau ber, kan ţaha min ţahpuite leh kan nuiha min nuihpuitu hian Kawlniho hi run la, keinin a rukin kan pui ang che,” an ti a.

Chawnglula chuan Suai run turin a bialte a kokhawm ta: mahse Kawlniho chuan an lo hria a, Suai-ah chuan ţan an lo khawh ve a. Chawnglula ho Suai run tur chu an puang sual a, Kawlniho chuan chhim hawiin an um vak ta zawk a, Chawnglula mi ţha 80 an thahsak a, an lal Chawnglula chu an man ta  a. Chawnglula meipek silai pawh an laksak a, hei hi Mizovin silai an hmuh hmasakna ber a ni. Heng hi Rosiamliana Ralte lemziak Pasalţha te Ropuina ( Heroic Fight of the Braves) ka en atanga ka thawnthu hlui haichhuahte an lo ni ta a, ka hlawkpui hle a ni.

Tichuan, Lemziak Enpui-a Rosiamliana Ralte lemziak pholante hi a lemziak hming atang rengin an Mizo raih hlawm mai a, Chawngtinleri , Sekibuhchhuak, Ka pu Vawmtlak, Zaman hmawng, Se chhun, Chhek in, Hnahkhawrin Mulek a hring, Thangchhuahpa Pialral kawng, Tlang tlir, Virthli Leng, Mizo thang, Tui-um Khirh tihte an ni nawk hlawm a, historical subject ţha tak takhlir mai an ni hlawm.

Tichuan, ka sawi tum tak han sawi ţan dawn ta ila: He lemziak idea hi a tha a, historical and grand subject a ni a, a ziaktu hian khatih laia Mizo lemziak mite’n hman nachang an la hriat loh Acrylic hman nachang a lo hria pawh hi a lo advanced zia a lang a. Amaherawhchu, han ti teh ang, artistic view atang chuan an thil tum hi a la hlenchhuak zo hlo hle a ni kan ti thei ang. Sial hrise tha pangngai vunrawng dum thle hlarh ang hi a sial rawngahhian a la ziakchhuak lo phawt mai a, seki rawng pawh hi a la dik tawk lo va, sial vun leh se ki hi a texture a inang lo khawp mai.

Mizo vanram ngaihhla phuahtute hi chuan Van ram pawh hi Mizo raihin an phuah thiam a, chutiang deuh bawk chuan Dullai sial leh Vankal sial insikna scenery mawlh mai hi a Mizoram lo lutuk deuh va, Mizoram scene ang tur hian ziak leh se a va tha dawn tua em ka ti han ti a ni.

Art is long Life is short an timathlawn lovin, art hian hun a heh khawp mai a, Leo Tolstoy thawhthu ziak ‘War and Peace’ pawh kha vawi tam a ziak nawn a, Ernest Hemingway-a pawh khan ‘Old Man and the sea’ kha vawi tam a ziak nawn a ziak nawn a, a tawp a tawpah masterpiece a lo ni ta chauh a ni.

Chutiang deuh chuan Pu Rosiamliana Ralte, Art instructor, Vice Principal District Institute of Education and Training (DIET) hian kum 30 kal taa a lo ziak Dullai Sial leh Vankal Sial hi technique dik zawk, colour harmony & combination dik zawk, anatomy tha zawk hian he a lemziak hi han thual ţha leh se, khawvel awm chhung zawnga Mizo thawnthu chuai thei tawh lo tur historical & grand subject ni bawk hi lemziak ropui takah a chhuah thei ang tih hi ka ringhlel miah lo va, kum 30 chhunga lemziak lama a hmasawn dan hmuchiangtu ka nih avangin ngennghawl ang reng takin a lemziak hi ziak ţha leh turin ka han ngen a ni e.

DULLAI SIAL LEH VANKAL SIAL

Dullai khaw hmun lui hi NE Bualpui leh Aiduzawl khaw inkar Dul lui kama awm a ni a. NE Buaipui atanga km 4 vela hlaa awm a ni a, leilet leh lo hmun atana ţha, hmun zawl leh rai nuam tak a nih avangin tunah pawh  leilet leh huan nghet atan mimal enkawl ram a ni zo deuh vek tawh a ni.

Dullai khaw hming hi thawhthua Dullai sial avangin hriat pawh a hlawh hle a ni. He Dullai sial hi a thinin a lu bawh tawk thla chu lungpuiah a zawng zawngin an ker a, tun thlengin hmuhtheihin a la awm nghe nghe a ni.

Hmanlai hian Dullai khuaah hian hmeithai pakhat a awm a, ran vulhah a tluang em em mai a. A sial pakhat chu a ţha fal bik hle a, a taksa leh a pian reng reng chu a ţha-in a chak hle a ni. A neitunu chu chu sial chu chi thlahtu atan tiin duat takin a enkawl a. Chi a liah dawn pawhin a inchung atanga liah a ngai ţhin a. A chi liah chu a ngeihin chakna leh ţhanna nasa tak a pek belhchhah a. Khaw hrang rhang aţangte hian chu sial en tur chuan an lo kal ţhin a, chutiang chuan a hming pawh a lo thang ta hle a ni. He se ruangam tur hi a lu lenzia leh a ki sei dan atang hian kan suangtuah thiam mai awm e. Hetiang hian :-

  • A ki hmawr ve ve inkar fit 9 leh inchi 4
  • A hmui atanga a tukhum fit 5 leh inchi 3
  • A ki sei sei lam fit 5 leh inchi 2
  • A chalpheng hlai zawng fit 4

 

Dullai khaw daiah hian chi khur a awm a, chu chu sialin an tlan ţhin a, an hrisel phahin an chak phah em em a. Chu chi khur tui al chu khaw dang sialte chuan tlan tumin an rawn pan ve ţhin a, mahse, Dullai Sial chuan a lo ‘keipui sa hauh’ ta hlur mai a; an tlan ţha ngam ta mang lo va.

 Vankal hi tuichangral chhak lam,a hnar kara awm a ni a. Mahse Dullai khua nen chuan kar hla tak a ni. Vankalah hian sial lian leh chak tak a awm ve bawk a. Ran hi an lo  mak thei ve viau mai a lo ni. Chutia duh anga chi tui an tlan ve thei lo chu tlawmpaeksenah a la ta a ni.

Tichuan, Dullai Sial chu hneh ve dan tur a ngaihtuah ta a. Tu khaw hrilh leh kawhhmuh ni hauh lovun, Pukzing ram “Sial chi tui’ khurah chuan thla thum a zuk rawl ta a. Vankal atanga “Sial chi tui’ kal tur chuan lui lian fe fe kan tur a awm thluah mai a. Mahse, chung luite chu dai hauh lovin, tlangdung leh khan ţha lai ngat zawhin a pan ta a ni.

Tichuan, Vankal sial chuan Pukzing rama chi tui khur, ‘sial ring tui’ an tih bawk chu a pan ta vang vang a. Tlang khan hlir a zawh a, Vankal atang chuan chhaklam hawiin a kal a, Khualen khan a zawh a,Tualpui khanah a chhuk a, chhak lam hawiin Rabung tlang a lawn chhuak a, Meitei tlang khanah a chhuak a, Zawlnghak khanah a chhuk zel a, chuta ţang chuan Dullai khanah a phei a, Bualpui tlangah a kal leh a, chhimlam hawiin a kal a, Kawlkulh tlangdung a zui a,Chhawrtui ah, Rullam tlang ah, Khawbel-ah a chhuak a, Thentlang khanah a kal zel a, hmar lam hawiin a zui a, Ţawi tlang ah a kal a, Hualtu mualah a chhuk a, Kumkhel khanah, Ruanzawlah, Chhingchhipah hmarlam hawiin a kal leh a, Baktawngah, Hmawngkawn khanah, Hmuifangah, Sialsuk ah, Sailamah a chhuk a, Chakhanah, Thenzawlah, chhim a pan a, Tlawng lui  hnar khan Senglawn atangin Sertlangah hmar lam hawiin a kal zel a, Kawlhawk tawngah, Buarpuiah, De leh Tut khanah a chhuk a, Parva tlangah a phei leh a, Mat leh Tut khanah, tichuan, ‘Sial ring tui’ chu a tlan ta a ni.

Vankal sial neitupa chuan kar lovah a sial awm loh chu a hre nghal vat a.An khaw chheh velte a zawn ngial hnuah pawh a hmuh zawh tak loh avangin Pukzing khaw lama ‘Sial ring tui” chu a zuk zawng thleng ta a. A sial a hmuh hnu chuan a pu chuan Vankal khaw lam panin a kal lama a kalna kawngah bawk chuan a kalpui leh ta a. Tichuan, sial dang zingah pawh inlar duh hauh lovin, a ruk thei ang berin a inthup tlat; Dullai Sial feh chhuak lo lambunna tur hmun remchang a dap a dap a, a tawlh liam ngei ngeina tur lai taka lo lambun tur chuan, kawngchhak lamah chuan a chang ta ran mai a.

Tuk khat chu le, an dan pangngaiin, tukthuan ei kham vel hian Dullai Se lian chu se dangte nen chi khur pan tur chuan an rawn inzui chhuak leh ta nguah nguah mai a. Sepuite chu a note te kovin an bu ruah ruah bawk a. Chi khur an thleng ţep tawh tih chuan, se chal dang thaw ri huam huam leh a phin ri chu an hre ta tlat mai a.Mak tiin an beng chu an tun hru hlawm mai a. Chutah thawklehkhatah Vankal Sial thau chum bat mai chu a rawn inlar thut mai a. Mahse, Dullai Sial chuan a huphurh loh hmel hle a. Rei vaklo an han inhrosak tawn hnu chuan a lianzawk leh huai zawk a inngai ta na na chuan phin chungin a pan phei ta a; A lo urlawkna a rei tawh bawk a, fing tak leh remhre deuh maiin tan a lo la a; han ţan chhin lailawk pawh nei lovin, a tha tawpin a lo bei nghal ta phat mai a; Dullai sial chu a han tawlh hlek a, hmun rem ta lo chu chhep sual lo thei hek lo. Kawng thlang awihah chuan a tawlh liam a, Dullai zawlah chuan a tla hlum ta der mai a ni.

 

Chutia Dullai se lian han thi ta mai chu Lal leh upate chuan an ui em em mai a, thalai thi ang hrimin khawtlang pawhin an sun a; awm ni an kham ta hial a. An chai hlaah te pawh hetiang hian an phuah tel ta hial a ni :-

Dullai khawpui takah,


Vankal sialin a len ruai e;
Dullai sial a awn ruai e,
Vankal sialin a phit dur dur –

He sial fing Vankal sial hian sakei pawh a sihlum a. Mahse, khatia sakei lungbanga a si bet tlat kha, a lo tawlh thlak hlek apiang khan a la nunga ngaiin a tha thlah dul a tum lova. A neitupain a va hmuh chuan, Sakei chu a lo lung nuaih nuaih tawh a; sial pawh kha chaw leh tui a ngheina a rei tawh avangin, a chhan thei ta bik lo va, a thi ve ta a ni.

 

Similar Articles

Top