You are here
Home > Asia News > Dr. VERGHESE KURIEN

Dr. VERGHESE KURIEN

Dr. VERGHESE KURIEN

Vawiin hi India ram pum huapa bawnghnute tihnianghnartu Dr. Verghese Kurien piancham a ni a, a chanchin tawite tal ka han ziah loh chuan ka inthiam lo deuh va, tawi te tak takin ka han ziak ang e.

 AAEAAQAAAAAAAAkqAAAAJDc0YTcyN2IyLTEwODItNDNiOS1hZmIwLWNjYWJiYTZlOGZiNA

Verghese Kurien hi kum 1921 November ni 26 khan Syrian kristian chhungkua atanin Calicut (now Kozhikode), Kerala-ah a lo piang a.A pa, Puthenparakkal Kurien kha British Cochin-a civil surgeon niin a nu chu lehkha thiam tak leh piano tum thiam tak a ni a.

Kurien hian  Loyola College, Madras atangin  B.Sc (Physics) a zirchhuak a, scholarship a hmu a, America ramah lehkha zir chhunzawmin Master of Science ( Mechanical Engineering) a zirchhuak leh a. Sorkar scholarship-a zir a nih avangin Gujarat state,  Kaira district, Anand khuaah Dairy division officer kum 5 thawk tur a ni a.

Anand a thlen chuan bawngpute chu butter siaktu company liante’n an lo bum nasa-in a hlawkna tam tak an lo eiruksak tih a hmuchhuak ta mai a.  A sorkar hna bansanin cooperative movement a din ta a, Kaira District Cooperative Milk Producers Union Ltd (KDCMPUL), a hnua AMUL an tih tak hi  an din a, bawngpu zawng zawng intelkhawmin an bawnghnute tharchhuah zawng zawng chu an bawngin kawtkaiah a leisak ta vek a. India ram sorkar laipuiin a hnathawh thatzia hria-in GCMMF (Gujarat Cooperative Milk Marketing Federation Ltd) and NDDB (National Dairy Development board) te dinin Dr.V.Kurien chu a kaihruaitu leh a hotu-ah an dah ta zel a, India ram pumah bawnghnute thar chhuah tamna White Revolution a thlen ta a, Anand Pattern an tih hi a lo piang chhuak ta a, keini ram kilkhawr ber Mizoram district tinah pawh Anand Pattern hi kan lohmang ve ta a, bawnghnute kan lo hnianghnar phah ve ta hial a ni.

Dr.V.Kurien hi lo hausa hle tawh mah se, a ngaihtuahna a chawl mai mai ngai lo va, mi rethei zawk bawngpu te hmakhua ngaiin thil ţha leh thil ţangkai a ngahtuah reng a, kum 50 a hna a thawh chhung hian India ram pum huapin hmasawnna namen lo hmuh tur a awm a, chawimawina pawh a dawng tam hle reng a. Ramon Magsaysay Award for Community Leadership (1963), Padma Shri (1965), Padma Bhushan (1966), Krishi Ratna Award (1986), World Food prize (1989), Padma Vibhushan (1999), Economic Times award for Corporate Excellence (2001) te pawh a dawng a, khawver university hrang hrang atangin honorary degree pawh an hlan nual a, kum 2012 September 9 khan a lo boral ta a, India ram hian a hnathawh ropui tak hi a hre reng a, amah pawh vawiin hian an chawimawi reng a ni.

Dr.V.Kurien hi ka ngaisang khawp mai a, kum 1994 September thlaa Mizo leh Vai intihbuai lai khan kan bawnghnute lakna Vai bawngpu, nausen neite khan an bawng kha min pem buhbel tawp mai a. Dr.V.Kurien hnathawh dan ka zir a, bawng vulh dan ka han zir tak tak ta mai a, bawng  zunte hi bawng-ek nen biogas-ah ka luan luhtir vek a, biogas kha a titam ta khawp mai a, ei rawngbawl nankan hmang thei a, methane gas-a insiam tawh bawng-ek kha chawp leh chilhin leiţha-ah a hman nghal theih ta bawk a, thlai hian an ngeih em em bik mai a, kum 2 bawng kan vulh hnu-in Gypsy thar var kan lei thei a, bawng-ek ring thlai tharlam kan ei reng thei a, kan lo hrisel ta em em mai a, Pathian zarah kum 30 sorkar hna ka thawh chhung hian Medical Reimbursement hi Rs. 7400 ( Cheng sangsarih leh zali chiah chiah) ka la bill a, LALPA chungah leh Dr.V.Kurien chungah hian ka lawm em em a, Thisen sang, zunthlum leh natna dang ka neih hma hian nitin darkar 2 ke-in ka kal ta ziah bawk a ni.

 

Similar Articles

Top