You are here
Home > World News > Dr.MARK ZUCKERBERG THUSAWI

Dr.MARK ZUCKERBERG THUSAWI

Dr.MARK ZUCKERBERG THUSAWI

Khawvel University tha chungchuang Harvard University atanga zir chhuak lo va bang ta, kum 2004-a he Univertsity dorm atanga Facebook siamchhuaktu, tuna khawvel mi hausa 5-na lo ni ta, Mark Zuckerberg chu a zirna Harvard University chuan honorary Doctor of Law degree an hlan.

Graduation Speech
Graduation Speech

He chawimawina a dawn ni, nimin khan Dr. Mark Zuckerberg chuan graduation thusawina a nei a, a thusawi lai hian ruah a sur a, a thusawi hi a nupui Priscilla Chan chuan ruahsur karah a ngaithlatu mipui zing atangin a lo ngaithla ve a ni.

_96216856_tv039706730

Kum 33 mi Dr. Mark Zuckerberg hi Harvard commencement-a thu sawi tawh zinga la naupang ber a ni a, a Facebook siam avang hian a sum neih hlut zawng hi $62.3bn (£48.1bn) vek niin an chhut a, vawiinah hian khawvel pum huapa ni tin Facebook hmang tangkaitute hi mi 1.9 billion ai tam kan ni lo ta a ni.

A nupuii ruah sur karah a thu a ngaithla lai
A nupuii ruah sur karah a thu a ngaithla lai

Mark Zuckerberg chuan, Kan chenna khawvel hi thil inthlakthleng zung zungna khawvel a ni a, khawvel pum huap veka thil inthlaktleng reng a nih a vangin kan dinhmun hi a pangngai reng thei lo va, chu chuan rilru lam buaina namen lo min neihtir mek a ni. Hmasawnna thil chak taka a thopa zuan mek lai hian a ngaihna hre lote chu hnuchawnin an awm mek a, zalenna te, langtlang taka inhawnna te, khawvel pum huapa inunauna leh inpawhtlan zawkna te leh thuneihna pumbilhna, inlakhran duhna te, leh mahni ram leh hnam bil hmangaihte te hi a insual reng a. Chutiang indona tuboh leh dolung karah chuan khawvel mi tam tak hi kan awm mek a ni.

FB a siamchhuahna pindan a kawk lai.
FB a siamchhuahna pindan a kawk lai.

Tunlai thiamna technology te hian kan chenna khawvel kalphung hi a thlak danglam mek a, chung technnology te chuan hmachhawp thar, mawhphurhna thar min rawn hluiin a rawn chhawpchhuak ta a. Kan pa te hun kha chuan lehkha an zir chhuah chuan hna an zawng a, an hmu a, khawtlang leh kohhranah an inhmang a, chu zawng chu a ni mai a. Tunah erawh chuan khatiang kha a ni tawh lo va, chuvangin tun lai thangthar lehkhathiamte hi chuan ngaihtuahna thar nen kan thluak kan vawrhvira, mi dang hna siamsak thei hmathar “ public work” vantlang tana thil tangkai tak project kan siam a ngai ta a ni. Chutiang siam thiehna hmanrua chu tunlai khawvel thiamna technology hian a rawn chhawpchhuak mek a ni, a ti.

Facebook a siamna dorm
Facebook a siamna dorm

Kan zirthiamna hi hna hmuhna atan chauh ni lova, mahni tan chauh ni bawk hek lovin , mi dangte tan malsawmna ni thei tur “social infrastructure” kan siama mi tin tan nun awmze nei, dam chhunga tum bik nei rana an khawsak theihna tur kawng kan sialsak a pawimawh a ni.

z

Kan khawtlang hmasawn tur chuan a ngaihtuahna thar nen a huhova thil tha ti tura hmachhawp kan neih a ngai a, thalaite hnatawh tur siamsak ringawt hi a tawk lo va, rilru puilting tak nena nun awmze hria, an dam chhan hre chiang thalai te kan chharchhuah a pawimawh a ni. Eng nge kan la nghah cheu? Tun hi thil tha tih tanna hun chu a ni a, mipui vantlangin huap zau taka an chhawr tangkai theih tur thil tha kan ti tur a ni. Thil ropui tak kan ti tur a ni a, hmasawna chauh ni lovin, nun awmze nei, rah chhuah nun nei mihring kan chherchhuak tur a ni, a ti.

A sawi zelnaah Dr.Zuckerberg chuan, ‘He lai University kalphung hi dik zik tluak lo lai a awm a, zirna ka bansan hnu kum10 chhungin sum maktaduai tam tak ka siam theih laiin he University atanga zir chhuak lehkhathiam tam tak chuan mahni ke-a dina sumdawnna bul tan theih a hnekin an lehkha zirna loan tak ngial pawh an rul hlei thei lo a ni,’ a ti bawk.

Dr.Zuckerberg leh a nupui Priscilla Chan te hian Facebook share atanga an sum lakluh 99% chu an dam chhunga mi dang tan malsawmna atana thawh vek an intiam a, kum 2015 tawp lama an share hlut zawng chu $45 billion a ni.

Harvard University atanga dropout bawk Bill Gates chu kum 2007 khan honorary degree an lo hlan tawh bawk a ni.

Similar Articles

Top