You are here
Home > Zoram > CHIEF MINISTER IN SERCHHIP P&E VENG BRANCH YMA SILVER JUBILEE LAWMNA A HMANPUI

CHIEF MINISTER IN SERCHHIP P&E VENG BRANCH YMA SILVER JUBILEE LAWMNA A HMANPUI

CHIEF MINISTER IN SERCHHIP P&E VENG BRANCH YMA SILVER JUBILEE LAWMNA A HMANPUI

Vawiin khan Chief Minister Pu Lal Thanhawla chuan Serchhip Project & Electric (P&E) Veng Branch YMA Silver Jubilee (1993-2018) lawmna inkhawm, P&E Veng YMA Hall-a neih chu khuallian niin a hmanpui.

2_1516357456

Chief Minister chuan P&E Veng YMA Branch chuan an indin kum 25 champha an hmang thei chu a lawmpui thu sawiin, YMA chu Mizo nih tinuamtu, chhiatni thatni a thlamuantu an ni, a ti a. Sawrkar hmalakna hrang hrang hlawhtlinna ah pawh tlawmngai pawlte tawiawmna in thui tak awmzia a neih thu te, khawtlang nun siamthatna, ‘moral reformation’ atana YMA pawimawhna te sawiin, ruihhlo do kawngah te, gas buk dik leh dikloh enfiah kawngah te, nungcha leh thing leh mau humhalh kawngah leh thangthar te zinga nundan mawi, aia upa zah nachang inzirtir kawnga an lo thawh tawhna zawng zawngah YMA chuan ram leh hnam tan an tangkaizia an tilang a ni a ti. Chief Minister chuan kuttlinglo a sum lak a awm loh nan tan tlan a ngaih thu sawiin, sorkar hmalakna tam tak, ram leh mipui tana that tlanna tir ni si, kut tlinglo a sum lak pawisa lote avanga thuanawm phah a awm thin thu a sawi a ni.

1_1516357453

Chief Minister Pu Lal Thanhawla chuan mipui, a bik takin khawsak harsa zawkte puih leh chawikan nana sawrkarin hma a lo lak tawhna hrang hrang tarlangin, tanpuina dawngtute zingah zawmthaw taka dawng ve mai mai te chu an dinchhuah theihloh thu leh, rinawmna leh taimakna nena thawk thinte chuan hma an sawn phah thin thu a sawi a. NLUP hmalakna in state pawn leh ram pawn atanga ngaihven a hmuh thu sawiin, tuna hmalakna thar NEDP hnuaiah pawh thalai ngaihtuahna leh remhriatna tha tak tak neite training pe a, state pawnahte thil zir chiang tura tirh an nih thu a tarlang a. Mahni tui zawng leh thiam zawng hna thawk a industry din a, midang tan eizawnna siamsaktu entrepreneur siam tura NEDP hnuaiah MEDMOC din a nih thu a sawi bawk. Ei leh bar a state a intodelh theih nan hmalakna hrang hrangte a hlawhtlin theihna tur chu mipui tawiawmna a nih thu khuallian hian a sawi a; ramri inkar insumdawntawnna lamah pawh kawl a eng hle a, chung zawng zawngah chuan sum leh paia a intodelh state bakah hnam zahawm kan nih tel theih nan state chhunga chengte kan thawhho a tul a ni, a ti. Chief Minister chuan NITI Aayog in a tehnaah Mizoram chu GSDP sang ber state zinga a dah thu leh chaw khawp khamlo tlemna ber state (least malnourished state)-ah a puan thu sawiin, chu nihna atang chuan a aia sang nih theih tum tur a ni, a ti bawk.

4_1516357461

Vawiin Serchhip P&E Veng YMA Branch Silver Jubilee lawmna inkhawmah hian Chief Minister tawiawmtu Pi Lal Riliani, President, Indian Society in Tobacco & Health: Mizoram Chapter chuan Jubilee Souvenir a tlangzarh a ni. CM hian jubilee lawmpui nan cheng singnga a pe bawk. Jubilee lawmna hi nizan (18.1.2018) atang khan P&E YMA Hall-ah vek hian lo hman tan tawh a ni. Serchhip P&E vengah hian kum 1974 vel atang khan chhungkua an awm tan a, tun dinhmunah chhungkua 460 vel awmin, In dinglai 368 bawr an awm a ni.

 3_1516357459

WRITTEN BY EMILY LALRINPUII, MIS, IPRO

DATED: 19TH JANUARY 2018, 3:54 PM | LANGUAGE: MIZO

 

Similar Articles

Top