You are here
Home > Zoram > CHIEF MINISTER IN SERCHHIP-AH MHIP DAY HMANPUI

CHIEF MINISTER IN SERCHHIP-AH MHIP DAY HMANPUI

CHIEF MINISTER IN SERCHHIP-AH MHIP DAY HMANPUI

Vawiin khan Chief Minister Pu Lal Thanhawla leh Mizoram Hmeichhe Insuihkhawm Pawl (MHIP) Patron Pi Lalriliani te chuan Mizoram Hmeichhe Insuihkhawm Pawl (MHIP) Town Area Committee, Serchhip ina Serchhip-a MHIP Branch a awmte a ruala MHIP Day vawi 43-na lawmna P&E Veng, YMA Hall-ah an buatsaih chu khuallian niin an hmanpui.
cm4_1499336011

Chief Minister Pu Lal Thanhawla chuan ziaktu pakhat in a ‘ Ka nu ang hi midang in nei vek sela, tan in hi siam a ngai lovang’ tia a sawi kha chhungkua leh khawtlang nunah nu te dinhmun a pawimawhzia a ti langin ka hria a, khawvel inkaihhruaina kalphungah nu te hi an ropui ber a ni tih he thu hmang hian a sawi theih a ni, a ti a. MHIP hi a pawl  hming ah insuihkhawm a tel avangin, insuihkhawmna hian awmze thuk tak a nei a, chu chu lungrualna, tanrualna leh inzahtawnna te a ni a, hengte hmang hian hmeichhia te  dikna leh chanvo atan an ding an ni tih chu an hriat tawh nih mahse hrethar leh turin MHIP member te chu a chah. Hun kalta ah, MHIP inthlanpui chu mipui leh amah pawhin a lo thlir dan te sawiin tun hma zawng aiin an inthlanna a thianghlim tawh leh tluang taka an inthlang thei hi a lawmawm a ni, a ti.

cm1_1499335973

Naupangin naupan laia a zir chu a puitlin thlengin a chawm chho a, chhungkua anga inzirtirna tha a awm chuan a ber kan kaina chhuanawm loh tak tak – cancer a kan sanna te, HIV/AIDS vei tam ber state 3 zinga pakhat kan nih te, naupang kum tling lo khuaikhemnaa kan sanna te, vaihlo hmannaa India a state sang ber kan nihna te kan pumpelh thei ang tih min ngaihtuah tir a, kan mawhphurna tlang vek a ni a mahse hemi atan hian hmeichhia, a bik takin nuho hi in pawimawh leh zual a, mawhphurna in nei sang a, khawtlang  nun siamthatna kawngah leh Kohhran tichakna kawngah nu te hi in pawimawh ber a ni, a ti.

cm3_1499335986

Pu Lal Thanhawla chuan India hmun dang ngaihtuahin chi leh chi inthliarna leh hausa leh rethei inthliarna kan nei  lo a, caste-less leh class-less society kan nei lo hi a ropuiin kan vannei hle a, mahse kan thawhchhuah leh hmanral a inmil loh chuan chhungkua kan dingchhuak thei lova, kan phu tawk ang kan hriat leh chumi anga kan insiamrem hi a pawimawh hle a ni, a ti. India rama hmeichhiate dinhmun chawikawnna kawngah Mizoram chu a ti tha pawl a nih thu sawiin hmeichhia te tana dan kan neih The Mizoram Marriage, Divorce & Inheritance Act hi dan tha tak a ni a, hmeichhia te dinhmun a that loh chuan khawtlang (society) tha kan nei thei lova, he dan hi kan that tlanna tur a ni, a ti.

cm2_1499335981

MHIP member te chu chhungkua, khawtlang leh Kohhran nunah an dinhmun a pawimawh zia hre tha ra, khawtlang nun siamthatna kawngah te, Kohhran nun tichak kawngah te leh ram leh hnam siamna kawngah nasa leh zawka an mawhphurna te hlenchhuak turin a fuih a, hemi atan hian tanrualna leh lungrualna a pawimawh zia hre turin a chah bawk a ni.

MHIP Day lawmna programme hi MHIP Serchhip Town Area Committee, President Pi Sanghmingliani’n kaihruaiin Father. Gabriel Laltlanthanga, Parish Priest, Catholic Church, Serchhip in hunserh a hmang a. Programme ah hian khualzahawm Serchhip DC Pi Sangchhin Chinzah leh MHIP Gen. Hqrs. President Pi Saipuii te pawhin thu an sawi a. Advocate Pi Lalfamkimi’n ‘Hmeichhiate humhimna’ tih thupui hmangin dan leh hrai inhrilhhriatna hun a hmang bawk a ni.

 

WRITTEN BY PRATAP CHHETRI MIS, PIO TO CHIEF MINISTER

DATED: 6TH JULY 2017, 3:43 PM | LANGUAGE: MIZO

 

Similar Articles

Top