You are here
Home > Zoram > CHIEF MINISTER IN PANG ZIRLAI PAWL INKHAWMPUI VATHUAMPUI AH A HMANPUI

CHIEF MINISTER IN PANG ZIRLAI PAWL INKHAWMPUI VATHUAMPUI AH A HMANPUI

CHIEF MINISTER IN PANG ZIRLAI PAWL INKHAWMPUI VATHUAMPUI AH A HMANPUI

Vawiin khan Chief Minister Pu Lal Thanhawla chuan Vathuampui, Lawngtlai District ah Pang Zirlai Pawl (PZP) inkhawmpui vawi 31-na chu khuallin niin a hmanpui a. AH & Vety. Minister leh Lawngtlai West bialtu MLA ni bawk Pu C. Ngunlianchunga chu khual zahawm niin Parliamentary Secretary Pu H. Zothangliana leh Lawngtlai District Bawrhsap Dr. A. Muthamma leh District officer dang thahnem takin he hun hi an hmanpui a. Vawiin vek khan Pang Zirlai Pawl inkhawmpui a hmanpui hmain Chief Minister hian Vathuampui Rest House, LADC in BADP sum hmanga sak leh Supply Department in Kudam NABARD sum hmanga sak te chu a hawng nghal a ni.

img_7204_1484223310

Chief Minister Pu Lal Thanhawla chuan Pathian in Zohnahthlak te hnam pakhata min enkawl danah leh Zohnahthlakah Duhlian tawng hrethiam lo an awm lo hi a laka kan special zia tilangtu a ni a, Kumpinu Sawrkar in Zohnahthlak te min sawi dan ‘Lusei-Chin-Kuki’ ah hian kan leng vek a, thisen a in zawm leh chhulkual khat chhuak kan nih angin tumah in la hrang thei kan awm lova, kan unauna tichak a, Zohnahthlak te inpumkhatna atan theitawp kan chhuah tur a ni a inlak hran tumte an awm anih chuan Pathianin mal a sawm ka ring lo a ti. Mizorama leilung fate zingah tumah minority kan awm lova, neitu nihna inchen leh mawhphurna inchen nei vek kan ni a, hetiang rilru leh ngaihtuahna hmangin ram hmasawnna atan theihtawp kan chhuah leh he mawhphurna hi kan zavaia kan hlenchhuah a tul a, kan tihmakmawh a ni, a ti. He ram hi ka ta a ni a, kein a hmasawnna tur ka ngaihtuah lo chuan tuin nge ngaituah bik ang tih rilru te hi kan put tlan a tul takzet a ni, a ti bawk.

img_7153_1484223302

Chief Minister chuan Kumpinu Sawrkar in Zohnahthlak te hi ram pathum ah min thendarh a, hemi avang hian kan tuar a, kan tawrh zel loh nan leh Zohnahthlak te inpumkhatna kan awmna ram theuha khua leh tui tha, khua leh tui rinawm kan nih a pawimawh a, chutiang beiseina eng neiin kan kal hi a pawimawh a ni, a ti bawk. Chhim lam chu Sawrkarin in ram dang nena insumdawntawna leh inkalpawhna atan chhuahka ber atana a buatsaih dante leh hemi atan hmalakna a neih dante sawiin Pu Lal Thanhawla chuan sumdawnna chhuahka bakah Pathianin min kohna chhan – Chanchin Tha hrila rahchhuak turah min kohna hi kan ti hlawtlinna kawng pawimawh tak a ni, a ti.

img_7164_1484223304

Hmasawnna chungchang sawiin hmasawnna hi tunge a tichhetu leh tunge a chhe lai siamtha tu tih hi mipuiin kan ngaihtuah a ngai a, hmasawnna chak kan duh chuan khua leh tui tha kan tih a tul a, hmasawnna rualkhai hi vawi leh khata a thleng thei lova, intahtawla ruahmanna te hi kalpui a ngai a, chutiang chuan hmasawnna kawng hi kan zawh chhoh mek a ni, a ti. District Council chungchang sawiin District Council hi musical chair a ni lova, englai pawhin rorelna thianghlim hmunpui a ni a, a ngelnghet tur a ni a, a ngelngeh loh chuan hmasawnna a thleng thei lova, nihna duh avangin leh sum leh pai duh avanga inpawhthlak tumna hi Sawrkarin a ngaihzam loh tur thu a sawi.

img_7175_1484223307

Pang zirlai te chu an zirna kawnga duhsakna hlanin ram leh hnam tan theihtawp chhuah turin a chah a ni.

Pu C. Ngunlianchunga chuan zirlai kalkhawmte chu an zirna kawngah tumruhna, tuarchelna leh beiseinna nen hlawhtling turin theihtawp chhuah turin a fuih a, hemi kawngah hian thahnemngai taka ke pen turin a chah bawk a ni. He hunah hian Pu C. Lalneihkima, Executive Member, LADC chuan inlawmna thusawiin, MSU leh MZP aiawhte pawhin thusawina hun an nei bawk a ni.

img_7209_1484223312

Vawiin programme hi Pu C. Lalhmingliana, Vice President, PZP chuan kaihruaiin hnam lam leh zai ten nen hman a ni. Pang Zirlai Pawl hi kum 1984 velah din niin vawiin inkhawmpui hmang turin Bangladesh atang pawhin palai an kal a, PZP inkhawmpui hi nimin a tan niin naktukah thleng a awh dawn a.

Vawiina programme ah hian PZP member zirna kawnga hlawhtlingte hnenah chawimawina an hlan bawk a ni. Vathuampui hi Lawngtlai District chhunga Bungtlang South RD Block a awm a ni a, Aizawl atangin kilometers 381 vela hla a ni.

Written by Pratap Chhetri, MIS, PIO to Chief Minister

DATED: 12th January 2017, 5:45 PM | LANGUAGE: MIZO

 

Similar Articles

Top