You are here
Home > Zoram > CHIEF MINISTER IN KOLASIB COLLEGE ATANA ST GIRLS HOSTEL HAWNG

CHIEF MINISTER IN KOLASIB COLLEGE ATANA ST GIRLS HOSTEL HAWNG

CHIEF MINISTER IN KOLASIB COLLEGE ATANA ST GIRLS HOSTEL HAWNG

Vawiin khan Chief Minister Pu Lal Thanhawla chuan Government Kolasib College atana Social Welfare Department hma laknaa sak Schedule Tribe Girls Hostel chu a hawng.

img_7899_1478603436

Chief Minister hi Social Welfare Department enkawltu Minister Pu PC. Lalthanliana leh Parliamentary Secretary Pu K. Lalrinthanga ten an tawiawm a ni. Chief Minister Pu Lal Thanhawla chuan Kolasib College atana ST Girls Hostel hawn a ni chu Kolasib leh College tan hmasawnna rahbi pawimawh tak tuk ni a ni a, a lawmawm hle a, tangkai thei ang berah hmang turin College hotute ka chah duh che u ni, a ti a. Khawpui zawka mimal ten hostel an din leh enkawl chungchang sawiin heng hostel te hi a chep a, an inhnawh tam lutuk vangin a hrehawm a, inhremna nasa tak a ni tiin heng hi ngaituahin hostel enkawlna dan mumal tak Sawrkarin a duan chu Hostel siam zawng zawng ten zawm vek turin a beisei a ni, a ti.

img_7910_1478603447

He hunah zirlai naupang kalkhawm te chu fuihin nu leh pa ten in laka beiseina sang tak neiin harsatna tam tak paltlangin, sum sengin in zirna atan tih tak zetin hma an la, in nu leh pate leh zirtirtu thu awih a, ai upate zaha, chung lam leh pawm lam nun ulukin, in zirna kawngah hlawhtlinna nei turin theitawp chhuah hi in timakmawh a ni, a ti a. Tunlai thiamna sang cho zel umpha leh hmang thiam turin in inpuahchah a ngai a ni a ti a. Zirlai leh thalai te tan tumna neih a pawimawh thusawiin hlawhtling turin tumna mumal tak neih hi a pawimawh a, chu tumna kan hlenchhuah theih nan kan zirna leh kan thil tih ah te theihtawp chhuaha tih tak zeta hma kan lak a ngai a, nakina inchhirin awmzia a nei lova, inthlahdah, hi a pawi hle thin a ni, a ti bawk.

img_7791_1478603429

Pu Lal Thanhawla chuan Sawrkarin zirna lamah a tam lam aiin a tha leh leh chhawrtlak thiamna a ngaihpawimawh thusawiin chuvangin Education Reforms Commission te pawh kha hun hmasa lama din a ni a, college lama infrastructure leh zirna tihmasawn leh tihchangtlun nan RUSA hi a tangkai thei ang berah hman dan ngaihtuah mek a ni, a ti bawk. Mizo thalai ten central services, central hna dang te leh sipai lama an luh theih nan Mizoram Youth Commission kaltlangin coaching class leh ruahmanna te siam anih thusawiin hengte hi ngaihvena hmang tangkai turin zirlai naupangte a fuih bawk a ni. Sawrkarin in thalai te tana khawvel thar a buatsaihna a bik takin infiamna lamah hmasawnna te hi zirlai ten hmang tangkai tura a duh thu a sawi bawk a ni.

Mizoram Sawrkarin hmasawnna kawng hrang hranga chak taka hma a lak mek thusawiin tunhnai November ni 4 khan India Today in Mizoram Sawrkarin Health leh Economy lamah hma kan lakna te chu hraiin State of the States Award 2016 ah heng Category ah te hian state tenau(Small States) ah Most Improved State(state hmasawn ber) chawimawina te min hlan a, heng Award hi Finance Minister Pu Lalsawta’n Mizoram Sawrkar aiawhin a dawng a, hei hian nasa takin Sawrkarin hma a la mek a nih tih a tilang a ni, a ti.

He programme a tel Sawrkar hnathawk te chu an hnathawhna te chu rawngbawlna a ni tih hria, Pathianin min hunna a piang hi a rawngbawl turah min hunna a ni tih hrain chumi hriatna nen mipui tan hna kan thawh a ngai, kan hnathawhnaah te hian langtlang taka kan thawh leh mipui te tan dawr nuam tak kan ni theuh a ngai a, chutiang ni theuh leh heng te hi hlenchhuak turin inthawhna theuha hma la turin ka duh che u ni, a ti.

He hun hmanpuitu Social Welfare Minister Pu PC Lalthanliana chuan Social Welfare Department in a buaipui hi Anganwadi leh tar pension chauh a ni lova, zirna lam pawh buaipuiin nasa takin hma lak mek a ni, a ti a. ST Girls Hostel hi 6 sak zawh tawh anih thu te, 7 dang sak mek a nih thu te leh Tuipang, Chawngte, Lawngtlai leh Ngopa ah te Eklavya Model Residential School sak anih thei nan chak tak hma lak mek a nih thu te a sawi a ni. Parliamentary Secretary Pu K. Lalrinthanga pawhin zirlai te hnenah fuihna thu sawiin hun a hmang a ni.

Vawiina programme hi Pu P. Lalchhuanga, IAS, Secretary, Social Welfare Department in a kaihruai a, Kolasib DC Pu H. Lalengmawia, IAS in inlawmna thusawiin Rev. Fr. Roman Mascarenhas in hunserh a hmang a. Building sak dan chungchangah Pu Robert Romawia Royte, MD, NECS in technical report a pe a ni.

Kolasib College atana ST Girls Hostel sak hi Kumtluang Hostel tia a hming phuah a ni a. A sakna atan hian cheng nuai 343.58 sen niin NECS in turn-key basis in an sa a. A sakna nana sum zawng zawng hi Ministry of Tribal Affairs in an tum a. A building hi chawng 4 (Basement chawng 2, Ground Floor leh First Floor) a sak a ni a. Dormitory bakah Warden Room, Chowkidar room, Common Room, Multipurpose Hall, Study Room, Dining Hall leh Kitchen te a awm a. Tui dah khawlna tanky(RCC) litre 54,000 dawng siam a ni bawk.

WRITTEN BY PRATAP CHHETRI, MIS, PIO TO CM

DATED: 8TH NOVEMBER 2016, 4:40 PM | LANGUAGE: MIZO

Similar Articles

Top