You are here
Home > Sports > CHIEF MINISTER IN 39TH MIZORAM STATE BOXING CHAMPIONSHIP 2017 HMANPUI

CHIEF MINISTER IN 39TH MIZORAM STATE BOXING CHAMPIONSHIP 2017 HMANPUI

CHIEF MINISTER IN 39TH MIZORAM STATE BOXING CHAMPIONSHIP 2017 HMANPUI

Vawiin chawhnu khan Chief Minister Pu Lal Thanhawla chuan 39th Mizoram State Boxing Championship 2017 Serchhip District Boxing Hall a neih kharna hun a hmanpui a. Boxer hlawhtlingte hnenah lawmman a sem nghal bawk a ni. 

20171013_160509_1507895181

Chief Minister Pu Lal Thanhawla chuan, “Mizo te chu sports discipline hrang hrangah kan tha a, contact sports-ah phei chuan kan that zia a lang chho meka, hmanni lawkah Tuipui Tlangval Laldinmawia, World Champion te kan nei leh ta a, a lawmawm hle a, Mizohming titha tu hi kan chhuang a, ka lawmpui takzet a ni”, a ti. Infiamna khawvelah sawrkarin khawvel thar a siam avanga hlawhtlinna tam tak a awm thu sawiin Sports Department enkawltu Minister taihmakna, sports administrator-te inpekna leh infiammi te tumruhna chu a fakawm thu a sawi a ni. 

20171013_160505_1507895179

Chief Minister Pu Lal Thanhawla chuan, “Mizoram pumpuiah Sports potential liantak a awm a, hei hi India sawrkar pawhin a hre chiang a. Hmarchhak bial, a bikin Mizoram hi an rawn en uluk tawh hle a ni”, a ti. Ramhmasawnna teh nan khawvelin sports chu tehna atan a hman pawimawh tak a nih avangin India pawhin a ngai pawimawh tih a sawi a. Sports kaltlanga hlawhtlinna  neih tum leh international level thleng tur chuan chhunglam leh pawnlam in uluk a pawimawh tih a sawi a. A pawimawh ber hriselna nei turin in uluk a, inthunun theih leh coach leh administrator-te thuawih a ngai a ti a.  Sports Administrator-te, coach leh zirtirna petu te pawh an nun in uluk tur leh engkima infiammite entawn tlak ni turin a chah a ni. 

20171013_160605_1507895186

Chief Minister chuan he hunah hian Serchhip District Boxing Association (SEDBA) in a hnathawh that avanga an chawimawi, Dr.K.Lallawmzuala, MO, Serchhip JN Hospital hnenah chawimawina a hlan a. ” Damlo te hmangaih taka enkawl thintu, a thiamna leh a duty avang piah lamah, a sum seng leh a thisen hial Damlo pe phaltu Dr.K.Lallawmzuala chu Doctor dang ten entawn se ka duh a. A thiltih hi a ropui takzet a ni. Tin, monitor an mamawh avanga sum thawhkhawma monitor leitu, Serchhip mipuite chungah ka lawm takzet a ni”, a ti a. 

20171013_160616_1507895188

Chief Minister Pu Lal Thanhawla chuan khelmual leh infiamna hmun hrang hrangaa sak mek te a tarlang a. Contractor-te hna muangchang chu tha lo a tih thu leh sawrkar pawhin a nawr hmanhmawh reng thu a sawi a. Serchhip a Football Stadium sak mek chu sak zawh a nih thuai theih nan theihtawp chhuah mek a nih thu leh Aizawl khawpui a Hockey Ground siam tum a nih thu te a tarlang a SEDBA hnenah tanpuina sumfai Rs.35,000/- an chhungkaw pualin a hlan bawk a ni. 

20171013_160600_1507895184

State Boxing Championship 2017 kharna hun hi boxing tan hma in neih a ni a. He hunah hian MIZBA President Dr.Zorammawia, AIBA Joint Secretary Dr. Lalrozama leh ROC Chairman Pu Lalnunmawia ten boxing kaihhnawih thusawina hun an hmang a ni. 39th Mizoram State Boxing Championship 2017-ah hian  ni 4 chhungin Boxer 136 ten category 41 ah champion nih tumin bout 95-ah an inhnek a. Sum lam harsatna avangin Lawngtlai, Siaha leh Champhai District te chu District team angin an tel thei lova. Nimin, October 12, 2017 Sub – Junior ah final bout 26 neih a ni a. Vawin khan Junior leh Senior boxer ten final bout 15 an khel a: Junior Boys a 49kgs-ah Lalrinngheta, SAI, 52Kgs-ah Lallawmawma, SAI, 56Kgs-ah Manarsuk Chakma, SAI leh 60Kgs-ah Lalnunzira, Lunglei te an Champion a. Junior Girls a 54Kgs-ah Ruthi Lalhmingthai, SAI leh 60Kgs-ah Vanlalhriatpuii, Aizawl te an Champion a ni. Senior Women a 54Kgs-ah Ruthi Malsawmkimi, Serchhip leh 57Kgs-ah Lalnunfeli, Aizawl te an Champion a. Senior Men Category a 49Kgs-ah Lalthasanga, Aizawl, 52Kgs-ah Freddy Lalchhanchhuaha, Serchhip, 56Kgs-ah Laldingliana, SAI, 60Kgs-ah Malsawmtluanga, Serchhip, 64Kgs-ah Lalnunfela, Aizawl, 75Kgs-ah Malsawmtluanga, Lunglei leh 81Kgs-ah Lalduhsanga, Serchhip te an Champion a ni.

WRITTEN BY MALSAWMSANGA, MIS, PIO TO CHIEF MINISTER

DATED: 13TH OCTOBER 2017, 5:16 PM | LANGUAGE: MIZO

 

Similar Articles

Top