You are here
Home > Zoram > CHAKMA CHUNGCHANG THU KAM KHAT CHIAH KA SAWI LEH DAWN! – Familia Fanai Lalţansanga

CHAKMA CHUNGCHANG THU KAM KHAT CHIAH KA SAWI LEH DAWN! – Familia Fanai Lalţansanga

CHAKMA CHUNGCHANG THU KAM KHAT CHIAH KA SAWI LEH DAWN! – Familia Fanai Lalţansanga

Chakma chungchangah pawl ţhenkhatin political issue siam an tum mek a, thu dik ziktluak lo an thehdarh nasa hle a, mahni tapchhak zawl atangin Chakma chungchangah hian kan lo sa em em vek hlawm a, a nihna dik takah chuan Chakmate hi hman lai Mizo lalte hun lai khan Mizoramah an lo awm tawh a, Mizo lalte hnenah chhiah chawiin an lo awm daih tawh a,  ni.

22050045_1263839293721969_7628315019870883994_n

Mizorama Chakma te chungchang thudik ziktluak lo va ziak thiam apiang kan lawmin kan haw haw dur dur a, chutiang thu belhchian dawl lo chuan Constitution of India a tidanglam thei lo va, haw haw-a inhawtpuk chiam hian  awmzia chhe te mah a nei bawk lo a ni.

22089102_1290513027760922_3123594110834972055_n

‘Rulin ka mei rap se, chu ila’ tih motive neiin Inthlan a hnai tawh bawk a, vested interest neiin mi tute emaw, leh eng pawl  pawl emaw, zirlai pawla inchhal zirlai ni tawh miah si lo te‘n politics khelh nan Chakma issue hi an thar thawh fo mai a. Buaina siam ila, tute emaw thisen chhuak se, arte thihin tute emaw thi se la, sorkar dinglai hi namthlu ila, keiniin chu chu advantage-ah la-in politics hamţhatna changin  politician-ah invawrhchho thei ila, tih kha kan duhthusam chu a ni mai!

22046653_1290512964427595_3827798562400161135_n

Chakma issue siam tumna lamah Mizo tumah arte thiha thi kan la awm lo va, kan vannei hle a ni.

22046565_1263839367055295_7777315028562555730_n

India rama Jammu and Kashmir ram chu Constitution of India chuan special status a pe a, India ram sorkar laipui-a sorkarna chang  eng party mahni an tidanglam thei tawh lo.

22045679_1264122647026967_6602645333203002164_n

Chutiang bawkin India sorkar laipui chuan Mizoram political party te thiam loh ni miah lovin Sixth schedule of the Constitution of India danhnuaiah kum 1972 April ni 29 khan Chakma Autonomous District Council a lo pe tawh a, a chhunga chengte chu India ram khua leh tuiah a pawm vek tawh. Chu chu keini lo inhawtpuk a, lo rikrap a, lo ţihţhaih chiam chiam khan awmzia chhe te mah a nei tawh lo. Chakma rikrap chu India danpui hnuaiah thiam loh kan chang nghal der a, umchhuah tum phei chu India sipai chakna zawng zawngin an humhalh ang tih danah a chuang vek a ni.

22089438_1264128760359689_1510426210819592619_n

Arunachal Pradesh-a Chakma raltlante pawh sorkar laipui chuan Indian citizenship pe vek turin thupek a chhuah a, Arunachal Pradesh sorkarin duh lo mah se, Constitutionof India dan anga pek tho tho an ngai dawn a ni.

Matana Pachuau of Australia chuan Arunachal Pradesh sorkarin pek a tum si lo va, engtin nge Arunachal Pradesh-a Chakmate an awm tak ang tiin  min rawn zawt a, ka chhang lem lo va, Arunachal Pradesh sorkar hi Constitution of India kengkawh tura thu intiamkama lak luh an ni chauh zawk a, dan chu an palzut thei tawp lo ang.

22045679_1264122647026967_6602645333203002164_n

Tuikuk Pathian siam theih loh an tihho hi kum 1997 khan Rashtriya Swayamsevak Sangh, Hindu kulmuk RSS ţhalai pawl Vanavasi Kalyan Ashram fuih pawrh avangin Mizoramah Autonomous District an phut a, kha tih hunlaia India President K.R. Narayanan hnenah Mizorama ADC pe turin an ngensak bawk a.  Bru National Liberation Front (BNLF) hel pawl chuan Mizoram Police te lambunin police 6 lai an kap hlum a.

Khatianga boruak rit tak Mizoram khawthlang lama a awm lai khan ka ţhian pa PHE EE chuan, ‘Tuikuk hel hi I hlau em? min ti a, “A mak khawp mai, ka hlau ve lo re re,” ka ti a. Khawthlang Tuikuk leh Chakma khaw chengker lama PHE tui pipe supply turin min tir ta poh va. Buaina leh harsatna awm lo vin  ka zuk dah fel vek a. Tlabung atanga Borabansuri ka Gypsy-a kan kal chu, kan haw lamah khaw thim tawh hnuah kawng zim lai tak chirhdiak karah lung lian pui hi an lo dah a, tuna PHE Southern Circle-a SE lo ni ta, khatih laia Tlangbung PHE SDO Pu Nghaka chuan, “Khaih, khaih,  khaih! Fimkhur rawh! Tuikuk helhovin min lambun dawn a ni ang! a ti chul a. Kei chuan “ Mizo ka ni a, Tuikuk helho ka hlau ve lo reng reng, ti lung lung chungin ka chhuak a, lung chu ka va paih a:” Min kap ngam ta bik em lo va! Gypsy chu ka khalh zui leh ta mai bawk a.

Tlabung PHE SDO quarter-ah keimah chauhvin ka riak a. Zan khat chu ka mut hi a tui thei lo reng reng mai a, ka hlau tlat mai a, mak ka ti khawp mai a.. A zan a zan chuan ka zirtir, ka sikul naupang lo ni tawh Lalnunmawia te inah ka insuanchhuak a. A tukah chuan, “I riahna quarter bulah hian Chakma raltlan mitthi tam tak an phum a, thlan lai thuk hman lovin khup chen lek lekah an phum ţeuh va, an hlau viau thin reng asin, thawm eng emaw I hria emaw kan lo ti a,” an ti a!

Kum 2016 February thla khan MBSE lam hotute’n Lunglei Education Department hotute lamah khan, “mi rintlak min rawn hrilh teh u,” an lo ti emaw ni. Tu in nge ka hming va hrilh ka hre lo va.  Matric leh Pawl 12 exam entawn hluarna ber Chawngte-ah Exam center 5-a Exam Supervisor turin min ruat ta mauh mai a. Ka zuk kal ta poh va. Ni 25 chamchilhin ka zuk vil ta poh va. Vai zirtirtute hian exam laia unfair mean an practice hi an lo man ngam reng reng lo mai hi  a lo ni a. Man vek turih ka hriattir a, an man a, an vau ta mai reng a. Mizoram Young Chakma Association ka pun a, a vautute kan zilh ta nghek a.

Chawngte ‘C’ Chakma veng Chakma Rest House-ah ka thleng si a. Mizo zirtirtu nupa hian min rawn tlawh a. Insawn vat rawh. Vengtu I nei si lo va, zirlaite’n an entawn thei tawh si lo va, an mangang nasa a nia. An khawih duh mai ang che, Mizo vengah insawn vat rawh” an rawn ti a. Ka han ngaihtuah vang vang a, Mizo ka ni a, Mizoram sorkar tirhin hna ka thawk a, Chakma zirlai hlauva han insawnchhuah  chu tlawmpa-ek-senah ka neih a, ka insawn duh ta bik lo va. Min vengtu tur security pawh ka dil duh ta bik lo va. Eng em chu ka ti bik lo va. Ka tihtur ka duty chu ţha takin ka hlenchhuak thei a. Kum 28 an lo chin ţhan HSLC leh HSSLC exam entawn chu ka tihreh vek thei ta a. Ka hnathawh ţhatzia chu kum 2016 Matric leh pawl 12 exam result bu kha lo en ula, in hrechiang mai ang. Chakma zirlaiho-vin min haw viau dawn emaw ka ti a, ka kalna apiangah min wish sup sup zel a, Chawngte High School Headmaster 2-in MBSE-ah Exam Sitting Supervisor-a keimah rawn tir leh turin ngenna an lo siam.

Chawngte-a ka cham chhung hian Chawngte ‘L’-a Chapchar Kut an hman ka chhim ve a, FB-ah ka post a, Vanglainiah an lo chhuahchhawng a, Chawngte ‘L’ YMA hruaitute an lawm hle. Chawngte-a Mizo hruaitute ka kawm kual hnem hle  a, Chawngte-ah Chakmate’n Mizote kut an thlak hmasa ngai lo a ni, an ti a, Aizawl lam atang hian boruak an rawn siam avangin buaina awm angin kan tlangthang mai mai thin a ni, an ti.

Kumin March thla pumpuhlum kha Nghalimluiah HSLC & HSSLC Exam center 3 vil turin ka zuk fehchhuak leh ta poh va, zirlai exam chhangte rikrap miah lovin entawn thei miah lovin ka zuk vil leh ta a. Vaseikai Young Lai Association President chu Tongchongngya hnam a lo ni reng mai a, Lai mi pakhatin Lawngtlai district Vaseikai khuaa YLA hotu Chakma an ni ta mai chu a rilru nat zia hnuk-ulh ţeuhvin min hrilh chiam mai!

BCM Secretary hnenah  lehkha ka ziak a, Nghalimlui leh Chawngte-a Baptist Boarding School-ah zirlai admit sen loh an lo awm ta a, zirtirtu 16 aia tam dah phal loh tih in dan siam hi siam tha ula, Nghalimlui leh Chawngte-ah khuan zirtirtu dah belh rawh u, tiin rawtna ka thlen a, an lo ngaihtuah a ni awm a, ka lawm hle.

Synod Moderator Rev. Lalzuithanga vawi 3 hmuh ka tum a, ka la hmu thei lo va, Vaseikaiah khuan Synod Home Mission High School din vat rawh u tih hrilh ka duh a, ka la hrilh thei lo a ni. Chakma, Bru, Bâwm leh Pâng hman buh seng tur tam tak an awm a ni.

Nghalimluia exam kan vennaa ka man zirlaite entawn tur lehkha them , cheated paper thlalak chu Pu M.Lalmanzuala leh Pu Maţana Pachuau of Australia te’n min dil chiam a, hei hi chu ‘official & confidential” a ni a, social media thehdarh chi a ni lo tiin ka pe duh lo a ni.

 Vawiin khan Kamalanagar College zirlai hruaitute chuan Ningania Chawngtea thil thleng social media-a thehdarh chu a dik tawk lo a ni tiin thuchhuah siamin an tarlang a, College zirlaite sikul kal tur an dan chungdchangah thil awmzia an zawhna chu chhang mumal lovin college zirlaite chungah tharum an thawh zuiah an puh a ni.

Chawngte zirlai pawl inti leh Tlabung DDK Aizawl news stringer pawh hian Chakma chungchang thu dik ziaktluak lo hi kan thehdarh fo a ni.

Ram leh hnam hmangaihna hi hnam dang huat inzirtir hi a ni lo tih hi kan hriat chian a hun viau tawh a ni. Kan velah buh seng tur tam tak an awm ta e.

 

Similar Articles

Top