You are here
Home > CCT Robawm > C.LURI PA MUMANG – Familia Fanai Lalţansanga

C.LURI PA MUMANG – Familia Fanai Lalţansanga

C.LURI PA MUMANG – Familia Fanai Lalţansanga

( Missionary Ni pual leh Mizo zinga Chanchin ţha meichher rawn chhi engtu Pu Buanga leh Sap Upa hriatrengna pual bikin ka thuziak thulkhung 3 ka haichhuak leh a, hei hi a pahnihna a ni.)

Pi Dari leh Pu Buanga
Pi Dari leh Pu Buanga

PI DARI KHA NAU NEI THEI LO TURIN A LO INSIAM RENG EM?

          1973 kum vel kha a ni ta awm e. Seventh Day Adventist Pastor C. Saikhuma (L) Lungleia a awm lai a ni a. Tuk khat  a zing tho hlim hlawt   chu hlimsanghovin ‘a lang’ an tih ang deuh hian Lunglei atanga km 5 vela hla Zotlang a pan ding nghal ta nal nal mai a ni. Chhim lam tirhkoh hmasa ber pathum zinga mi Pu Buanga  nen rei tak lo inhrawn tawh Pastor Zathanga ĩn chu a pan ding nghal a.

          Pastor Zathanga-te in a han thlen chuan Pastor C. Saikhuma chuan thaw hlawp hlawp chungin, “Nizan khan mumang ang deuh, mihlim tan phei chuan mumang tih phal rual loh, zel ang deuh hi ka nei a!” tiin Pastor Zathanga chu a hrilh ta a.

          A mumangah chuan mi pakhat, kawr var thianghlim tak  ha  hian Zoram thim em em hun lai, Kristian la awm hma hunte leh Sap Upa leh Pu Buanga Mizorama an lo chhuah laite chu chiang lutuk tak mai hian a lo hmuhtir a. Tin, Pu Buanga Sapa rama nupui a zuk nei a, London atangin Zoram pana an lo chhuah kawngah Kolkatta an  thlena ‘Pathian Aw’ an hriat thute leh Pu Buanga nupui, Mizovin Pi Dari kan tih mai chu chawp leh chilha fa nei thei lo tura Kolkatta damdawi in a insiamtir nghal thu te a lo hrilh bawk a ni.

          Pastor Saikhuma chuan “Ka mumang hi a mak em a, Pu Buanga te nupa chanchin hrechiang tur awm chu nang chauh i dam tawh si a, Pi Dari kha nau nei thei lo turin a lo insiam reng em? tiin Pastor Zathanga chu a zawt ta chawt a.

Sawi hreh deuh ni awm takin Pastor Zathanga chu a ngawi deuh vang vang a, chutah, Pastor Zathang chuan, “ Khuma, i thu mi han zawh kher kher chu le! He thu hi ka dam chhungin ka sawi chhuak lo vang tiin ka lo intiam a. Pu Chala ( Pastor Challiana) chu sawichhuak lovin a lo boral tawh a. I hmuh dan a mak em a, kei chu sawichhuak  lo thei lovin mi siam ta a nih hi! Pathianin thupbo hlen a phal lo a ni ang e’ a ti ban charh charh a.

Pastor Zathanga chuan muang deuh cherh chawrhin a sawi ta a, “ Pu Buanga leh Sap Upa kha 1894 kum khan Aizawl an lo thleng a, kum 4 an awm hnu-in Sap ramah an haw leh a. BMS ( Baptist Mission Society) tirhin Zoram chhim biala thawk turin 1903 kum March thlaah an lo chhuak leh a. A kum lehah Pu Buanga chuan London nula Miss Eleanor Maber Atkinson chu nupuiah a zuk nei a. Mizo chuan Pi Dari kan ti mai a. Chutia an innei zo hlim Zoram pana an lo kal chu Khulkhut ( Kolkatta hi hmanlai chuan Mizo te’n Khulkhut an ti a) an lo thlen chuan Pathian Aw an hria a, “Ramthimah engmahin  in hnathawh a tibuai tur a ni lo va, fa pawh in nei tur a ni lo” tih a ni a.

An nu London khawvawta lo seilian tan Khulkhut khaw lum lutuka han insiam chu a huphurhawm hle reng a. Mahse ‘Pathian aw’ a ni miau si a. Pi Dari chu nau nei thei lo turin a insiamtir ta nge nge a ni.

Pu Buanga khan Pu Chala (Pastor Challiana)  nen a pindanah min ko lut a, he thu hi min hrilh a, “ In nupui te ve ve pawh hrilh suh u” min ti nghe nghe a ni” tiin a sawi a, “ Pu Chala chuan engmah sawichhuak lovin a lo chawl tawh a, kei erawh chu sawi lo thei lovin min siam ta a nih hi” a ti ta a.

CHHIM LAM PALAITE

Pastor Zathanga hi 1906 kuma Bapist kohhran tirhkoh tura inpe 3 zinga mi kha niin Khasi ram Harhna han chhim a, Zorama harhna rawn pawchhuaktu palai 10 zinga mi kha niin  Mizo tlangval rual French ram kal  hruaitu zingah a zuk tel tluanchhuak parh a, Zoram Baptist kohhran ban pathum zinga pakhat tih ngam khawp hialin Pathian leh kohhran tan mi inpumpek a ni a, kum 90  a nih kum 1976 kum khan a boral ta a ni.

Pastor-Zathanga-1

Pastor Zathanga hi Sap Upa, Mr. Savidge-an anmahni rawngbawlnaa an thachhangdawl tura a kilkawi leh a zirtir a ni a. Pu Buanga Bible lehlin ţanpui tur bika a chherchhuah a ni a, Pu Buanga awm tawh lo hnuah pawh Mizo Bible lehlin chungchanga mi pawimawh leh mi ţangkai tak a ni chho ta zel a, Mizo Bible, Thuthlung hlui leh Thuthlung thar bu pum an chhut lai zawnga Calcutta khawpuia Proof Reading tia zuk cham chatchilh  ngat ngattu ka a ni.

IMG_20180111_151705

Mizo hawrawp A Aw B kan neih hma khan sorkar chuan Zoramah Vai sikul te lo din hmanin Office leh Court-ah Bengali țawng hman tur an lo ti hman tawh a. Pu Buanga hi țawng thiam mi linguist a ni a, Mizo A aw b min siamsak avangin sorkar chuan a policy thlak lehin Mizo țawngin engkim kan zir theih phah ta a, Rev.Dr.C.L.Hminga chuan, Chanchin țha hi keimahni Mizo țawng leh Mizo hawrawp  ngeiin inpekchhawn ni ta lo sela chuan kan hnam pum hian Chanchin Țha hi kan la chang kim lo tawp ang a ti, a ni.

Serampore-a MIzo tlangval Pathian thuzirte
Serampore-a Mizo tlangval Pathian thuzirte, Pastor C.L.Hminga B.D a zirzo hlim.

Fa an neih loh avangin Pu Buanga te nupa chuan an hun pum bakah an ngaihtuahna zawng zawng nen lam Pathian rawng an bawl theih phah ta a, Pu Buanga khan kohhran enkawl hna a thawh bakah Thuthlung Thar pum leh Thuthlung Hluia Genesis, Sam leh Isaia te Pastor Challiana leh Pastor Zathanga te tanpuina-in  a letling hman a ni.

15941506_1325125964219106_5352468175903690073_n

Falu hloh huama Zoram chhim bial ngawt pawha kum 30 lai rawng an bawl hnu, 1932 kum khan a pension ta a, Sap ram London-ah an haw ta a. Sap rama an haw hnu pawh hian Pu Buanga chuan Zofate ten lehkhabu rotling Mizo English Dictionary a la siam ta fan a, July ni 1, 1944 kum khan a boral a, a nupu Pi Dari chu 1959 kum khan a boral ve ta a ni.   

Pastor C.Saikhuma hi zaithiam C.Luri pa a ni.

Zoluti fate 2
Zoluti fate 2

Nikum January ni 11 khan Rev.Dr.CL. Hminga hnen atangin Mary Winchester Zoluti fanute pahnih Mary leh Peggy te, 1962 kuma an in kawta an thlalak ka va haichhak a, Pu Buang leh Pi Dari te thlalak hi lian leh fiah zawkin ka siamtir a, a frame ka siamtir bawk a, ka lehkha ziakna dawhkan hma zawn bangah ka tar a, he thlalak enchung hian ka dam chhung hian Mizo țhalaite tan thu leh hla ̍țha ka ziak zel tawh ang tiin Pathian hmaah inhlantharna, commitment ka nei leh a ni.

Pu Buanga te nupa Sap rama haw hlen tur thlahna, Kikawn, Lunglei, 1932
Pu Buanga te nupa Sap rama haw hlen tur thlahna, Kikawn, Lunglei, 1932

 

Similar Articles

Top