You are here
Home > World News > BLACK HOLE ATANGA GRAVITATIONAL WAVES BAWK!

BLACK HOLE ATANGA GRAVITATIONAL WAVES BAWK!

BLACK HOLE ATANGA GRAVITATIONAL WAVES BAWK!

Mi fing chungchuang Albert Einstein khan Gravitational waves hi a awm a ni tih kum 1915 daih tawh khan a lo sawi tawh a, kum 100 a liam hnu-ah Albert Einstein thusawi chu a lo dik ngei a ni tih tunlai thiamna sang tak hmanrua hmangin an lo finfiah thei ta a, kawlkil hla tak atang khawpui ri der der ang deuh hian van thenreng hla lutuk eng kum billion 3 vela  black hole 2 insut avanga nghawr der der, gravitational waves  chu kan chenna khawvel atang hian vawi 3 an hre thei ta tlat mai a ni.

BlackHoleArtZoomOut.medium__1_.1496337992

Bucket chhunga tui-ah hian lung zuk thlak ta ila, tuifawn chu bucket lai atangin a sir lamah a fawn kal darh zer zer ang chiah hian van thenreng zau lutuk, hun leh hmun mihring rilru leh suangtuahna-in a hriat phak ngai reng reng loh khawpa zau leh reiah khian chutiang tuifawn ang gravitational waves chu kum 2016 Febraury thla khan hriat a lo ni tawh a, a hnu lawkah hriat a ni leh a, kumin January ni 4 khan khawl ropui leh changkang lutuk  the Laser Interferometer Gravitational-wave Observatory@  LIGO an tih bawk hmangin an lo hre thei ta a ni.

BHmassChartGW17

LIGO
LIGO

Simplified_diagram_of_an_Advanced_LIGO_detector

He thil ho ang reng taka ngaih theih hian van sang chanchin zir mite leh physicist te chu a tiphur nasa ta mai a, an phur teh hawrhna chhan kha kan zuk hriatthiampui lo mai thei a, a chanve chanve tal kan lo ngairuat thiam theih nan an phur chhan 6 ka han sawi ang a.

  1. Hun kal tawha thil thleng a hmuh theih dawn; tuna kan buaina chu telescope eng anga chak leh ṭha pawh hian van thenreng thim zinga thil a hmu thei tlat lo va, tuna an hmuhchhuah thar gravity-ah hian thil inthup reng reng a awm lo va, a lang tlang vek a ni.
  2. Einstein theory of general relativity zir chian belh theih a ni dawn; Kum 100 kal taah khan Einstein khan theory of general relativity kha a lo tlangzarh tawh a, mahse he a theory hi ngaihruatnaah a tawp a, finfiah theihna a la awm lo a ni. Laws of quantum mechanics hian a hrilhfiah chiang thei lo va, tuna an hmuh thar gravitational waves hmang hian Einstein theory of general relativity hi a zir chian theih an beisei a ni.
  3. Gravitational wave + electromagnetic observations; Arsi hi a lo thih hian eng pe chhuak thei tawh lo, muk em em si, gravity nasa tak pe chhuak reng Neutron stars-ah a lo insiam ta thin a. Chung arsi thi tawh awm dan leh an thil phuhchhuahte chu gravitational wave leh electromagnetic waves chi hnih hmangin an zirchiang thei tawh dawn a ni.
  4. Black hole-te inhel dan zir chian theih dawn; Gravitational wave astronomy tel lo chuan eng ang thiam scientist pawhin black hole te hi ka chenna leilungin Ni a hel ang hian an inhel a ni tih an finfiah thei ngai lo va, tunah chuan gravitational waves avangin black hole 3 te chu an inhel reng tih an lo hre thei ta a ni.
  5. Dark Matter lo pianchhuahna chhui theih beisei: Van thenreng hi a ruak vek lo va, dark matter an tih hian 27% vel a luah turah an ngai a, mahse dark matter chu a thim miau avangin mit-a hmuh theih a ni bawk si lo a ni.
  6. Hmuh theih loh gravity lo chhuahna chhui chian theih beisei: Thil eng pawh hmun luah thei apiang leh rihna nei apiang (matter) hian inhiptawnna gravity a nei vek. He gravitational waves hmang hian dark matter chanchin, khawi atanga lo piang chhuak nge a nih tih an zir chian theih beisei a ni.

(Pathian zarah a dam hi han hauh phawt mai ila, Genius Albert Einstein chanchin leh a theory leh a thil hmuhchhuahte Mizo ţawng ngeiin ka la rawn hrut chhuak ang e.)

Similar Articles

Top