You are here
Home > Asia News > AUNG SAN SUU KYI NEW DELHI-AH ZIN DAWN

AUNG SAN SUU KYI NEW DELHI-AH ZIN DAWN

Myanmar State Counsellor Aung San Suu Kyi leh ASEAN ram palaite chu karleh khian New Delhi-ah an rawn zin dawn a, Suu Kyi hi Republic Day parade-ah khuallian a ni ang.

January ni 3 khan Union Cabinet chuan  India leh Myanmar ramri atanga km 16 huam chhunga Myanmar ram mite zalen taka India rama an zin theihna tur border Pass siamsak vek tur thutlukna a lo siam tawh a, Sorkar laipui chuan he thu hi Arunachal Pradesh, Nagaland, Manipur leh Mizoram sorkar thuneitute a hriattir tawh a ni.

India leh Myanmar ramri hi km 1,643-a thui niin Arunachal Pradesh-in km 520, Nagaland-in km 215, Manipur-in km 398 leh Mizoram-in km 510 –a thui Myanmar ram nen an inri a ni.

He ramri kana zalen taka insumdawntawn theihna thuthlung hi New Delhi-ah an ziak fel dawn a ni.

Kum 2015 khan Manipur hel pawl National Socialist Council of Nagaland-Khaplang (NSCN-K)te chuan Chandel District-ah India sipai lambunin sipai 18 lai an kap hlum a, hel pawl hi Myanmar ramah an tlanchhe ta daih a. India sipaite chuan Myanmar ramah han umzuiin an han bei leh ngat a ni.

Kha thil zirchiangtu Joint Intelligence Committee chief R.N. Ravi kaihhruai high-level committee report chuan India leh Myanmar ramri-a zalen taka inkalpawh zung zung theih dan tur rawtna a thlen ta a, chu thu kal zelah leh zalen taka insumdawn theihna hian hmasawnna a thlen hrim hrim beiseina avangin inkalpawh zung zung theihna dan hi an lo siam ta a ni.

Hetih lai hian he dan hian India sorkar laipuiin Rohingya Muslim te chungchanga a ngaihdan a thlak tihna a ni lo va, Rohingya Muslimte chu India rama luh phalsak an ni lo thung a ni.

Indo-Myanmar border trade chungchhang ram pahnih palaite an inbiak a pianga a tir phat atanga tel ziah thin, fam chang ta Rihlipui Nghaka khan min hrilh dan chuan, Mizorama ţhalaite pawh hi nakin hun rei lote-ah Mandalay khawpui thleng thleng khian anmahni motorin an lo zin thei dawn a, tuna an mutan hote chu Myanmar sorkar hian lirthei chetsual thulhah insurance pek a inhuam loh vang mai mai a ni, a ti.

 

Pix; Moreh Indo-Myanmar Border, Manipur

Similar Articles

Top