You are here
Home > Zoram > AIZAWL KHAWPUI-A YMA BRANCH 81 HNENAH KANGTHELH TUI PIPE LEH TUICHAWINA POINT 400 HLAN A NI

AIZAWL KHAWPUI-A YMA BRANCH 81 HNENAH KANGTHELH TUI PIPE LEH TUICHAWINA POINT 400 HLAN A NI

AIZAWL KHAWPUI-A YMA BRANCH 81 HNENAH KANGTHELH TUI PIPE LEH TUICHAWINA POINT 400 HLAN A NI

Vawiin chawhma khan PHED leh Fire & Emergency Services huaihawtin Aizawl khawpui chhunga YMA Branch 81 te hnenah kangthelh a tul huna tui chawina point, 40MM Fire hydrant hmun 400 leh kangthelh tui pipe metre 15 a sei,75 metre a zawm sei theih, tel 5 theuh, rikrum thil- kangmei a lo chhuah hun bika hman tur leh a enkawl chhunzawm hna Home Minister Pu R.Lalzirliana’n a hlan.

Kangthelh tui pipe leh fire hydrant inhlanchhawnnaah hian PHED Minister Pu Zodintluanga leh Capt. Hmingdailova Khiangte, Parliamentary Secretary te an tel a. He hunah hian Aizawl khawpui hmun 40 a bun tawh, kangthelh lirthei tana tuichawina hmun, 65 MM Fire hydrant te pawh hawn nghal a ni.

Home Minister Pu R.Lalzirliana chuan tunhma atang tawha ngaihtuahna an neih tawh tihpuitlin a lo ni ta chu lawm awm a tih thu sawiin tunlai khawvel thang zelah Mizoram in hmasawnna mellung thar a phun belh a ti. Thiltha neih avanga lawmna chang hriat a pawimawh tih tarlang in mipui vantlang tana rotling a nih avanga a enkawl leh venhim hna pawh vengchhung mipui ten an mawhah la se a duh thu a sawi a. “Phunchiar si, a thalai erawh zep tlat kan nih ang tih hi a hlauhawm a, kan in enfiah a hun tak zet a, sawrkar hmalakna tha tak tak te hi kan chawimawi hreh a nih pawhin kan roh tala, a venhim hna pawh kan mawhphurhna a ni tel tih kan hriat erawh a ngai’, Home Minister chuan a ti a. YMA in sawrkar a thawhpuina chu tunhnai thil a nih loh thu leh YMA chu tunhma YLA a nih lai daih atang tawh khan, ram leh khawtlang tana thiltha duh intelkhawm ,mi tlawmngai midang tana thawkchhuak thin te din a ni a ti a. YMA leh NGO te thlawpna avangin sawrkar hmalakna pawimawh tak tak pawh a lo hlawhtling thin tih sawiin sawrkar pawh, NGO te thlawpna avanga a lawm thu leh a phur sawt thu a tar lang. Vengchhung hmasawnna leh chakna chu a chhunga NGO te, Local Council leh mipui inlungrualna vang a ni thin a ti a; Department hrang hrang te pawh in thawhhona tha an neih a, hmasawnna kawnga an inel chuan sawrkar hmalakna pawh a chak sawt thin tih sawiin chakzawkna atan leh hlawhtlinna atan tanrual a pawimawh ber a ti a. Khatla-ah Fire Station hawn thuai a nih theih nan chak taka hmalak a ni tih a sawi a. Home Minister Pu R.Lalzirliana chuan Central Sawrkar atanga Cheng Vaibelchhe 10 sawrkar in tuizem leh tul dang te siam belhna tur a hmuh thuai a beiseiawm tih tarlangin kangthelhna tur bakah rikrum thila hman tur, tui khamkhawp khawl thei tura hmalak mek a ni a ti.

PHED Minister Pu Zodintluanga chuan kumtina Mizoram mipui ten an hlauhthawn, kangmei huphurhna chu thal a lo thlen hunah a zual thin tih a sawi a. Minister chuan he hlauhthawnna hi Aizawl khawpui chhung bikah chuan a lo ziaawm deuh a beisei thu sawiin Fire hydrant 440 chu kangmei rikrum thilah hman tangkai a nih tur thu a sawi a. Hetih rual hian kangmei chhuak a awm lohna tur leh thil pawi zawk a lo thlen lohna tura mi zawng zawng kan fimkhur tlan a tul thu a tarlang. Bul tanna anih vanga beisei ang diak diaka fire hydrant te hi hman a nih theih loh pawhin enfiah a, thuam that a, tih changtlun zel a ni ang tih a sawi a. Siam that ngai leh rawtna tha zawk te mipui-vantlang atanga dawng turin sawrkar a in hawn thu sawiin District khawpui leh hmun dangah te pawh hmalak chhoh zel sawrkarin a tum thu a tarlang a. Fire hydrant a pipe vuahchhawnna 50 aia tam rukbo a nih thu sawiin mipui vantlang te chu kangthelhna hmanraw pawimawh zia hrechiangtute an nih vek avanga venhim hna thawhpui turin a sawm a ni.

Kangthelhna hmanraw pawimawh inhlanchhawnna hun hi Pu V.Lalremthanga, Secretary, PHED in a kaihruaia. Capt Hmingdailova Khiangte, Parliamentary Secretary bakah Pu Neihchungnunga, Director, F&ES leh Pu Lalbiakzuala, President, CYMA ten thusawina hun an hmang a. Er.Lalmuanzova, E-in-C, PHED chuan technical report pe in Fire hydrant a kangthelh tui pipe vuahchhawn dan entirna leh inkawhhmuhna hun engineer leh fireman ten an hmang a ni.

WRITTEN BY MALSAWMSANGA, MIS, IPRO

DATED: 31ST JANUARY 2017, 2:30 PM | LANGUAGE: MIZO

hm_1485853199

20170131_120107_1485853197

20170131_113703_1485853195

20170131_113447_1485853193

Similar Articles

Top