MISSION

Mizoram hi Lalpa zawnchhuah ram kan ni a, Zofate hi Lalpa zawnchhuah hnam kan ni tih hi kan pawm a, Zonunmawi hi mawi taka vul zel a, entawntlak a nih theih nan Social Media, IT leh ICT hi a tangkai thei ang ber leh a tha zawnga hmanga Mizo hnam nun ze mawi tak takte haichhuah a, vawn nun tlat a, nitin khawsakna leh kan eizawnna muala a lo lanchhuah (practice) theihna tura ţanlak hi kan tum ber a ni.

VISION

Vision chu rilru mita chiang taka hmuh, mahse a tak hmuh tur la awm si lo, beiseina nung siamtu hi a ni a. Chu beiseina nung chuan rilru- chhia leh tha hriatna thiang (conscience) takah mei angin a mut ţan a, zawi zawiin a kang a, a mit leh mai mai lo va; chu beiseina nung, rilrua nung reng, mit thei reng reng lo chuan vision hmutu chu a vision a taka chantir a nih hma loh chuan a nawr kal thin a ni.

Dr. Abdul Kalama chuan, “Dream” chu kan muthilh laia ka hmuh mumang mai a ni lo va, muhil thei lova min siamtu, kan thil vei em em hi a ni, a ti a, kan vei zawng zawng erawh hi chu “ Vision” a ni lo: thil ţha lo thleng tura kan duh leh beisei, mahse lo la thleng si lo, a lo thlen hma lova kan rilru luahkhat tlattu leh thleng thei tura min nawrkaltu hi Vision chu a ni.

Ram tin kil tina Zofate hi la insuihkhawm thei rih lo mah ila, Social Media, IT leh ICT hmangin hmangaihnaa insuihkhawmin lungrualna tlangah kan lengho thei a, Zonun ze mawi: dikna, rinawmna, thuawihna leh taihmakna te kan lo neih theih nan kan thinlung mit tihvar (enlgihtenment) hi a pawimawh ber a. Rilru mitvarna ( enlightenment) chang mihring hi a thatchhia-in a pachhe thei lo hrim hrim! Chu rilru mit varna, ignited mind kan lo neih theihna tur chuan thu leh hla tha leh hriatna kan neih a ngai a. Ringtu chu a intodelh tur a ni a, a zahawmin a thianghlim tur a ni. Chu vision kan lo thlen theihna turin chanchinthar mai bakah Mizo thu leh hla ţha leh Pathian thu thlengin Zoram khawvela Zofate tan chhawpchhuah kan tum a ni.

Digital Empowerment Foundation founder & director Osama Manzar chuan, hlawh nei miah si lo va, Mizo tlawmngaihna avanga Mizo special Report FB Group-a member 155,000 lai awmna Pu Vanneihthanga Vanchhawng leh a thawhpui Admin te’n an din thei hi mak a tiin ropui a ti hle a, hetiang reng renga member tamna FB group, chanchin inhriatpawh zung zung theihna “Digitally Empowered Community” hi North East India-ah hian eng chanchinbu mah a awm lo hial ang, a ti a ni.

Facebook hi a ţhat em em laiin post hlui haichhuahleh hi a harin a buaithlak em em a. Entirna pakhat chiah han sawi ta ila: Pu Vana Sai Sual post hit em em kha Website-a sengluh tumin ka hai ngar ngar a, ka la haichuak zo lo a ni. Chuvangin Mizo Special Report FB Group nghenchhanin Chanchinthar.Com Page leh Website kan han siam ta chu a ni a, post hlui eng ang pawh click chhuah zung zung theih a nih bakah CCT Robawmah hian Mizo thu leh hla ţha thlankhawmte leh Pathian thu, pawl pawl sawi lovin academic leh sermon ţha apiang sengluh kan tum mek a, Rev.Dr.Zairema, Rev.Dr. Lalsawma, Rev.Dr.K.Thanzauva te nupa baka Zanlai Au Aw Dr.B.Sailo leh Dr.Lip te thu leh hlate pawh sengluh zel kan tum a ni.

Chu kan vision ropui tak chu zawi zawia kan lo tihhlawhtlin theihna turin Lal Isua Thawhlehna thiltihtheihna (The power of Resurrection) ringin mawl leh tlawm takin bul kan han ţan a ni a, Chanchinthar.Com page hi min lo ‘like’ sak a, kan website min lo tlawhsak fo turin kan ngen che u a, Thurawn ţha tak tak min pek kan beiseiin Mizo ram leh hnam tana tangkai tur thu leh hla ţha tak takte rawn thawh ţhin turin kan ngen bawk che u a ni.