You are here
Home > Zoram > AADHAAR CHUNGCHANGAH CHIEF MINISTER INRAWLH TA!

AADHAAR CHUNGCHANGAH CHIEF MINISTER INRAWLH TA!

Chief Minister Pu Lal Thanhawla’n July ni 16 a Rashtrapati Bhawan-a Inter State Council meeting vawi 11-naah Mizorama Aadhaar pekchhuah a muanchan chhan chungchang a sawilan hnuin, vawiin khan Prime Minister Pu Narendra Modi-a hnenah hemi chungchang hi ziakin a thlen a. Mizorama Aadhar nei an la tlem avangin scheme hrang hrang a bik takin Scholarship leh eirawngbawlna gas-a subsidy Direct Benefit Transfer an dawn turah Mizoram mipuiin harsatna an tawh loh nan Bio Metric Enrolment inziahluhna leh Aadhar pekchhuahna kawngah chak taka hma lak sak turin a ngen a ni.

Chief Minister Pu Lal Thanhawla chuan March ni 31, 2016 thlenga Mizoram puma Aadhar pekchhuahna atana National Population Register zulzuia Bio Metric Enrolment (BME) tih tawh zawng zawng chu mihring awmzat atanga chhuhtin za zelah 58 vel chauh a la nih thu a tarlang a. Aadhar pekchhuah phei chu a la tlem lehzual a. Chuvangin BME leh Aadhaar hian mipui tam tak huam a la hmabak a. Hengten mipui a la huap zau lohna chhan tam tak zingah duhthusama internet inthlunzawmna a that loh leh hmun tam taka a hmantlak loh avangte, hmun kilkhawra intlawhpawh a harsat avangte leh NPR buaipuitu ten hmanrua an ruahman kawnga thil an tihfuh loh avangte a nih thu hi a lehkha thlen ah hian Chief Minister chuan a tarlang.

Chief Minister chuan heng harsatna ngaihtuahin tun dinhmunah chuan BME-a inziahluh zawhfel hmain Sawrkar Laipui ruahmanna leh scheme a bik takin LPG subsidy PAHAL ah leh UGC Scholarship leh Fellowship dawnna turah Mizoram tan chuan Aadhaar thlunzawm hi a la tihkim theih vek lova. BME ah inziahluhna hna zawhfel anih thei nan Prime Minister chu he hna buaipuitu atana mawhphurhna pek Registrar General of India (RGI) thuneitute a tul anga amahin thu pek sak turin a ngen a. Aadhaar leh DBT chungchanga Prime Minister kaihhruaina hnuaia May ni 5 a meeting neiha DBT pekchhuahna scheme a Aadhaar thlunzawm tihkim hun kumin December ni 31 tih leh DBT hnuaia hamthatna leh ruahhman zawng zawng te thlunzawm kim hun March ni 31, 2017 tia thurel lo awm tawh thlirin hemi kawngah hian Mizoram chu hun pek belh turin Prime Minister a ngen bawk.

BME hi a rang thei ang bera zawhfel a nih a, Direct Benefit Transfer (DBT) hi mitinin an chhawr thei nan RGI leh a rawih agencies-te chu theitawp chhuahin State Sawrkarin a tawiawm tur thu a lehkha thlen ah hian Chief Minister hian a tarlang bawk.

A lehkha ah hian tunhnaia Ministry of Human Resources Development-in UGC hnenah sawrkar kum 2016-17 atanga Scholarship leh Fellowship pekchhuahna ah te Aadhaar thlunzawm tur tih thupek a chhuah chu State Sawrkar leh Nodal Department-in theihtawp an chhuah chung pawhin tun dinhmunah State Sawrkar tan kalpui a harsa tih a tarlang tel bawk a ni.

NPR zulzuia BME-a inziahluh leh Aadhaar pekchhuah hna hi Mizoramah October ni 5, 2013 atanga kalpui tan niin he hna kalpui tur hian Registrar General of India-in Electronics Corporation of India Limited (ECIL) chu Registrar atan a ruat a. ECIL hian Mizoramah he hna buaipui turin Kolkata firm pahnih – LRYA leh ISS te ruaiin, kumin March ni 30 khan BME-a inziahluh leh Aadhaar pekchhuah hi zawh hman tura beisei an nih laiin mipui tam tak an la inziaklut thei lo a. Registrar General of India in nakum March ni 31 thleng BME  atan hun a pawtsei chungin mi tam tak chu BME ah an la inziaklut lovin kumin April ni 1 atanga khan NPR zulzuia BME kalpui hi a tawp hrih a ni.

Similar Articles

Top