You are here
Home > CCT Robawm > 2014 PADMA SHREE CHAWIMAWINA DAWNGTU C.CHHUANVAWRA

2014 PADMA SHREE CHAWIMAWINA DAWNGTU C.CHHUANVAWRA

2014 PADMA SHREE CHAWIMAWINA DAWNGTU C.CHHUANVAWRA

C.Chhuanvawra hi Hrangţhiauva leh Darrovi te karah 1941 kum khan khawchhak tlangdunga Leithum khua-ah a lo piang a.A pu Khuangchungchunga hi Leithum khuaa lehkha chhiar thei leh ziak thei awmchhun a ni a;lal fapa a ni na a khawchhiar a ni a.A lo boral khan a fapa Hrangţhiauva chu naupang hle mah se lehkha chhiar thei awm chhun bawk a nih leh avangin naupang te ni chung siin khawchhiar hna a thawk leh ta a.

10347698_582377108533511_5360325353825452759_n

Hrangţhiauva chuan a pa Khuangchungchunga’n hmanlai chanchin a lo chhinchhiah leha lo ziak nial nualte chu 1920 atang khan a ziak ţha-in a chhinchhiah belh ta zel a,a zinna apiangah hmanlai chanchin hre deuhte len chilhin a kawm zel a,thu hre deuh awm an awm chuan khual khaw hla deuh pawh nise a hranpa te pawhin a pan ţhin a ni.

10665823_582377085200180_8913896356635456914_n-1

C.Chhuanvawra hian a pa Hrangthiauva’n kum 30 lai a lo chhinchhiah ţhat Mizo chanchin chu mumal zawka phuahkhawmin a ziak țha leh ta a,ram buai kum 1966 kuma chhut mai theih tura a peih diam tawh chu 10th Sikh Battalion Captain pakhatin a laksak ta daih mai a!

1975 kum atang khan C.Chhuanvawra te pafa chuan lehkhabua chhuah theih turin an ziak ţha leh ta a, 1978 kum khan ‘Mizo Chanchin’ chu an sualchhuak thei ta hram a, a bu-a tihchhuah a lo ni ta a ni.

Hetia Mizo chanchin lehkhabu lo chhuah dan ka han sawi kual duahna chhan chu C.Chhuanvawr hian Mizo tawng, Mizo thu leh hla leh Mizo chanchin hlui hi a pu atang tawha lo chhui, lo zirchiang tawh a nih avangin thisena ţhanhnan kan tih ang hian ka ngaihtuahna a lo sen nasatzia tarlan ka duh vang a ni a.Chu-a-chhap-ah,Hrangthiauva chanchin hi Leithum khaw bul Khawbunga piang ka pu Rev.Dr. Lalsawma ka zawt a, “Hrangthaiuva hi thu chhin mi, khaw chhiar, a dam chhung zawng mite rawn kai, pa fel tak a ni” tiin min hrilh a.

‘Sakawlin sakawl a hring,Se rângin se râng’ an lo timathlawn lovin Hrangțhiauva thil chhinchhiah theih dan mak tak mai chu a fapa C.Chhuanvawra hian a rawn chhun ta chiah a, chu tak chu Mizo tawng , Mizo thu leh hla leh chanchin hlui lamah Mizote tan hian an thawhhlawk pu-tu-fa hlawm ta hle reng a ni!

Țiau lui bul maia awm an nih avangin Mizote thlang rawn tlak hma Lentlanga hnam dang chanchin pawh an ziak kimchang hle reng a, ‘Mizo Chanchin’zaiktute hian lehkhabu dang rawn nei miah si lovah chuan ‘critical analysis’ pawh an nei tha ber reng a ni.Mizo hnahthlak zawng zawng chhip zumah ‘Mizo’ hman nachang te a lo hria a ni. Ama’rawh chu he lehkahbu a hmuh dan ziaktu Darchhawna’n ‘Eng bu mah hi a mal chuan a famkim thei lo” a tih hi a dik ziktluak fu a ni.

Kum 45 zet Mizo tawng leh thu leh hla lam lo zira lo beichiangtu C.Chhuanvawr hi Middle School Headmaster kum 27 zet a thawh chhungin sikul a tlai ngai lo ang a ni a, loh theih loh thilah vawi 8 emaw chu a sikul tan dar a nang hman lo hret a ni awm e. 2002 National Award for Teachers dawngtu C.Chhuanvawra hian hla (poems) 72 a phuah a, lemchan(dramas/plays) 2 a ziak a, magazine hrang hrangah articles/essays 542 a thawh a,lehkahbu 8 leh hla 5 bihchiahna (review )a ziak a, seminar paper 35 a ziak bawk.

A kutchhuak lehkhabu-te;

(a) Chhakchhuak History-2001
(b) Lalvanchhingpuii (Drama)-2004
(c) Zo Kung (Poetry) -2005
(d) Sakei Ngho Seh (Drama)-2006
(e) R.Vanlawma leh Kei (Criticism)-2009
(f) Zampuimanga (Historical Biography)-2010
(g) Zo Khawthlir (Selected Essays & Articles)-2010
(h) Rinpuii leh Seizika (Novel)-2011
(i) Hmanlai leh Tunlai Hlate (A Critical study on Mizo Folksongs, Hymns and Poetry)-2011
(j) Hlaraw Hrilhfiahna leh a Hman dan (Dictionary of Poetical Words with examples)-2012
(k) Sangsarih Khawpui (Critical Study on Mizo History)-2012
(l) Mizo Tawng Chhuina (Research on Mizo Language)-2013

A kutchhuak Mizo zirlai bu-a hmante;

(a) Hawrawppui Hmanna-Class III (Mizo)
(b) Punctuation-Class IV (Mizo)
(c) Mizo Țawng Grammar-Class V (Mizo)
(d) Mizo Inchei dan (Essay)-Class V (Mizo)
(e) Mathematics-Class V
(f) Mathematics-Class VI
(g) Thli (Essay) -Class VI (Mizo)
(h) Parts of Speech-Class VI (Mizo)
(i) Mizo Țawng Grammar-Class VI (Mizo)
(j) Mathematics-Class VII
(k) Parts of Speech-Class VII (Mizo)
(l) Ziah Zawm tur leh Zawm loh tur-Class VII (Mizo)
(m) Mizo Țawng Grammar-Class VII (Mizo)
(n) Rinawmna (Poem)-Class VII (Mizo)
(o) Ziah Zawm tur leh Zawm loh tur-Class VIII (Mizo)
(p) Mizo Țawng Modification-Class VIII (Mizo)
(q) Ziah Zawm tur-Class IX (Mizo)
(r) Ziah Zawm loh tur-Class X (Mizo)
(s) Zofate Inpumkhatna (Poem)-Class X (Mizo)
(t) Zoram Inpui Pahnihna (Essay)-Class XII Mizo (Core)
(u) Zun (Poem)-Class XII Mizo

(Elective)
(v) Dawi ang I dawm ang u (Poem)-B.A. (MIL)
(w) Mingo |inru Zamual Liam Tawh Ru (Poem)- M.A. (Mizo)

(x) Hrui ang kan inawm Thisen ngeiin (Poem)-M.A. (Mizo)
(y) Chapchar Kut (Poem)-M.A. (Mizo)
(z) Sakei Ngho Seh (Drama)-M.A. (Mizo).

Thu leh Hla (The Monthly Literary Journal of MAL) editor ni lai mek C.Chhuanvawr hi Academic bodies, Media leh NGO lamahte nihna pawimawh tak tak a lo chelh tawh thin a ni.

Mizo zingah thil finchilh tak tak peih,luchilh tak tak ngam hi an tlem em em a, engkima a phawvuaka phul ve hlut ţhin , mahni hriat ai a tam tam thu puarpawleng erawh hniak phawi map lo va hlam thum aia tam tam sawi thei ţhiau awmkhawm kara Mizo thu leh hla kum 45 zet finchilh a, mi dang hriat atan leh zir atana ziak chhuak thei ,mi bik, thil chhinchhiah thei tak leh hriatrengna nei țha tak C. Chhuanvawra te ang mihring hi mi zahawm,mi taima leh mi chhuanawm chu an lo ni ngei e.

A Pathin thu teh rut lo zawngin thufingte 4;7-9 hi ka ngaihtuah fo thin a,

4:7 Finna hi thupui ber a ni a; chuvangin fina hi nei rawh;
A ni, i thil neih zawng zawng chan pawhin finna hi nei rawh.
4:8 Chawimawi la, anin a chawi sâng ang che;
I lawm chuan zahawmah a siam ang che.
4:9 Khawngaihna lukhum i lu a khumtir ang a,
Mawina lallukhum a pe ang che.

(Mizo tawnga lehlin ai hian a sap tawngin King James Versionah ngei hian a fiahin a chiang zawk! Finna hi a ‘personify’ avangin)

Proverbs 4:7-9 King James Version (KJV)

Wisdom is the principal thing; therefore get wisdom: and with all thy getting get understanding.

Exalt her, and she shall promote thee: she shall bring thee to honour, when thou dost embrace her.

She shall give to thine head an ornament of grace: a crown of glory shall she deliver to thee.

Mihringte chu kan lo rinawm lovin uire te pawh kan ching fo a ni mai thei. Finthiamna kan zawna kan hmuh chuan chu finthiamna chuan min phatsan ve ngai dawn lo va, min uiresan dawn hek lo a ni.Hriatna,thiamna leh finna ber zawk hi zawng tak taktu tan chuan chu finthiama chu a lo hmu ngei țhin a, chu thiamfinna(wisdom) chuan amah zawng hmutu chu a tawpah a chawimawi nge nge thin a lo ni.( Hriat tam leh Hriat zau ngawt hi wisdom a la tling lo va, chu hriat tamna tak chu ka nitin nuna a țha zawnga a hun dik taka hman țangkai thiamna kha ‘wisdom’ chu a ni)

India President lo ni tawh Abdul Kamal khan Republic Day thuchahah India țhalaite tan hian entawntlak mi țha, role model kan mamawh a ni a tih ang kha… C.Chhuanvawra ang mi enawntlak hi an lo ni e.

 

Written by Familia Fanai Lalțansanga

Dated; 8th October 2014 | Lunglei

Similar Articles

Top